مسروقہ زیورات پہن کر واٹس اپ اسٹیٹس پر تصویر لگانے والی گھریلو خادمہ گرفتار

حیدرآباد: مسروقہ زیورات پہن کر اپنی تصویر واٹس اپ اسٹیٹس پر لگانے والی گھریلو خادمہ کو پولیس نے گرفتار کر لیا۔ یہ دلچسپ واقعہ اے پی کے ضلع گنٹور کے تاڑے پلی میں پیش آیا۔ تفصیلات کے مطابق دو ماہ قبل ایک فلیٹ میں چوری کی واردات پیش آئی تھی۔

پولیس نے بتایا کہ امود نامی شخص تاڑے پلی اربن علاقہ کے ڈولاس نگر کے ایک اپارٹمنٹ میں مقیم تھا۔ جاریہ سال 29 نومبر کو اس کے فلیٹ میں چوری کی واردات پیش آئی، جس میں چار طلائی چوڑیاں، ایک نیکلس، دو کان کی بالیاں، بے بی چین اور دیگر اہم اشیا اڑالی گئی تھیں۔

پولیس نے امود کی شکایت پر اس سلسلہ میں ایک معاملہ درج کرکے جانچ شروع کی تھی تاہم امود کی بیوی نے ملزمہ سنیتا کو مسروقہ ساڑی اور زیورات پہن کر شوہر کے ساتھ لی گئی تصویر کو واٹس اپ اسٹیٹس میں لگا ہوا دیکھا۔ اس نے فوری طور پر اس بات کی اطلاع اپنے شوہر کو دی، جس نے پولیس کو چوکس کیا۔

پولیس نے منگل گری کے بس اسٹینڈ کے قریب سے سنیتا کو حراست میں لے لیا۔ وہ اپارٹمنٹ میں خادمہ کے طور پر ملازمت کرتی تھی۔ پولیس نے کہا کہ اس اپارٹمنٹ کے منیجر نے اس کو خالی فلیٹس کی صفائی کے لئے چابیاں حوالے کی تھیں، تاہم اسی دوران سنیتا نے امود کے فلیٹ کی نقلی چابیاں حاصل کرلیں اور یہ چوری کی واردات انجام دی۔