کرناٹک میں ’حجاب‘ سے ہٹ گئی پابندی، کانگریس حکومت نے وعدہ کیا پورا

کرناٹک کی کانگریس حکومت نے اسمبلی انتخاب سے قبل کیے گئے ایک ایک اور وعدے کو پورا کیا ہے۔ ریاست کے تعلیمی اداروں میں مسلم طالبات کے حجاب پہننے پر عائد پابندی ختم کرنے کا فیصلہ کیا گیا ہے۔ ریاست کے وزیر اعلیٰ سدارمیا نے جمعہ کے روز واضح لفظوں میں کہا کہ ’’ہم حجاب کے فیصلے کو واپس لیں گے۔ ریاست میں اب حجاب پر کوئی پابندی نہیں ہے۔ خواتین حجاب پہن کر کہیں بھی جا سکتی ہیں۔ اس سلسلے میں افسران کو (حجاب پر پابندی سے متعلق) حکم واپس لینے کی ہدایت دے دی گئی ہے۔‘‘

وزیر اعلیٰ کا کہنا ہے کہ ہر کسی کو لباس کا انتخاب کرنے کا حق ہے، اور اس پر کوئی پابندی نہیں ہونی چاہیے۔ انھوں نے کہا کہ ہر کسی کو اپنی مرضی کے مطابق کپڑے پہننے کا حق ہے۔ اپنے حساب سے کھانا کھانے اور لباس زیب تن کرنے کا حق ہے۔ اس پر مجھے کیوں اعتراض ہونا چاہیے۔ جس کو جو مرضی وہ کھائے، جو مرضی وہ پہنے، مجھے اس کی پروا کیوں ہوگی؟ سدارمیا نے یہ بھی کہا کہ ’’ہمیں ووٹ پانے کے لیے اس طرح کی سیاست نہیں کرنی چاہیے۔‘‘

قابل ذکر ہے کہ اس سے قبل اکتوبر میں سدارمیا حکومت نے مقابلہ جاتی امتحانات کے دوران طالبات کو حجاب پہننے کی منظوری دی تھی۔ دراصل بی جے پی قیادت والی کرناٹک کی گزشتہ حکومت نے 2022 میں اسکول و کالج میں طالبات کے حجاب پہننے پر پابندی لگا دی تھی۔ اس پابندی کے بعد ریاست میں کافی ہنگامہ ہوا تھا اور کانگریس سمیت کچھ دیگر سیاسی پارٹیوں نے بھی اس پابندی کی مخالفت کی تھی۔

کرناٹک میں حجاب تنازعہ کا آغاز ریاست کے اڈپی واقع ایک سرکاری کالج سے ہوئی تھی جہاں مسلم طالبات کو حجاب پہن کر کالج آنے سے روک دیا گیا تھا۔ اسکول انتظامیہ نے حجاب کو کالج کے یونیفارم کوڈ کے خلاف بتایا تھا۔ اس کے بعد یہ تنازعہ دیگر کالجوں میں بھی پہنچ گیا تھا۔ پھر مسلم طالبات نے جگہ جگہ احتجاجی مظاہرے کیے تھے۔ ہنگامہ بڑھنے کے بعد بی جے پی حکومت نے تعلیمی اداروں میں حجاب پر پابندی لگا دی تھی۔ اس فیصلے کو مسلم طالبات نے ہائی کورٹ میں چیلنج پیش کیا جہاں عدالت نے حجاب پر پابندی کے فیصلے کو برقرار رکھتے ہوئے کہا تھا کہ حجاب پہننا اسلام کا لازمی مذہبی پریکٹس نہیں ہے۔ پھر معاملہ سپریم کورٹ پہنچا جہاں دو ججوں کی بنچ نے الگ الگ فیصلہ سنایا۔ ایک جج نے کہا کہ اسکول اپنا یونیفارم نافذ کرنے کے لیے آزاد ہے، جبکہ دوسرے جج نے اسے پسند کا معاملہ بتایا تھا۔