مدھیہ پردیش میں ژالہ باری کے ساتھ زوردار بارش، کسانوں کی فصلیں برباد، کانگریس کا حمایتی قیمت میں اضافہ کا مطالبہ

بھوپال: مدھیہ پردیش میں پیر کی رات ہوئی بارش اور ژالہ باری سے کئی علاقوں میں فصلوں کو نقصان پہنچا ہے۔ وزیر اعلیٰ شیوراج سنگھ چوہان نے فصلوں کو پہنچنے والے نقصان کا سروے کرنے کی بات کہی ہے، وہیں کانگریس نے کسانوں کو راحت فراہم کرنے کے علاوہ امدادی قیمت میں اضافے کا مطالبہ کیا ہے۔

خیال رہے کہ راجدھانی بھوپال کے علاوہ مندسور، رتلام، راج گڑھ، شاجاپور، سیہور کے اضلاع میں پیر کی رات تیز ہوا کے ساتھ بارش اور ژالہ باری ہوئی، جس کی وجہ سے فصلوں کو کافی نقصان پہنچا ہے۔ کھیتوں میں کھڑی چنے اور گندم کی فصلیں متاثر ہوئی ہیں جب کہ آنے والے دنوں میں بھی بارش اور ژالہ باری کا امکان ظاہر کیا جا رہا ہے۔

کانگریس ایم ایل اے اور سابق وزیر جیتو پٹواری نے کہا ہے کہ مغربی مدھیہ پردیش میں تیز ہواؤں کے ساتھ بارش اور ژالہ باری ہوئی ہے جس کی وجہ سے 80 فیصد کسانوں کی گندم اور چنے کی فصلوں کو نقصان پہنچا ہے۔ پوری ریاست میں یہی صورتحال ہے، آلو کے کاشتکار بھی مسائل کا شکار ہیں۔ کسانوں کے آلو 3 سے 4 روپے فی کلو فروخت ہو رہے ہیں جبکہ انہوں نے جو بیج بویا ہے اسی کی قیمت 7 سے 8 روپے فی کلو تھی۔ انہوں نے کہا کہ حکومت کسانوں سے بات کرے اور گیہوں کی امدادی قیمت 3000 روپے فی کوئنٹل مقرر کرے۔