اومیش پال قتل معاملہ: الٰہ آباد یونیورسٹی کے ’مسلم ہاسٹل‘ کو پولیس نے کرایا خالی، ’عید تک رہے گا سیل‘

الہ آباد: اومیش پال قتل کے معاملہ میں ایل ایل بی کے طالب علم صداقت خان کی گرفتاری کے بعد پولیس اور ضلع انتظامیہ کی ٹیموں نے مسلم بورڈنگ ہاؤس کے تمام 107 کمروں کو سیل کر دیا ہے۔ ہاسٹل کے سپرنٹنڈنٹ ڈاکٹر عرفان نے اس سلسلے میں بتایا کہ ’’اسے (ہاسٹل کو) امیش پال قتل کے سلسلہ میں خالی کرایا گیا ہے۔ یہاں صداقت خان کمرہ نمبر 36 میں ناجائز طریقے سے رہتا تھا۔ یہ (ہاسٹل) اب عید تک سیل رہے گا۔‘‘

خیال رہے کہ 24 فروری کو الہ آباد (پریاگراج) میں اومیش پال اور ان کے دو سیکورٹی گارڈز کو ہلاک کر دیا گیا تھا۔ پولیس نے ملزم صداقت کی گرفتاری کے بعد ایم بی ایچ خبروں میں تھا۔ مسلم لٹریری ایسوسی ایشن نامی ٹرسٹ سے وابستہ مسلم بورڈنگ ہاسٹل میں رہنے والے بیشتر طلبا الہ آباد یونیورسٹی میں زیر تعلیم ہیں۔

ایم بی ایچ کے سپرنٹنڈنٹ عرفان احمد خان نے کہا کہ صداقت کو ہاسٹل سے باہر نکال کر اس کمرے کو بند کر دیا گیا تھا لیکن چند دنوں کے بعد اس نے تالہ توڑ کر دوبارہ کمرے پر قبضہ کر لیا۔ صداقت 27 فروری کو پولیس کی حراست سے فرار ہونے کی کوشش میں زخمی ہوا تھا۔ پولیس نے اس کے کمرے سے ایک پستول اور کچھ زندہ کارتوس برآمد کئے ہیں۔

ایم بی ایچ کے سکریٹری اور شہر میں مقیم تاجر برکت علی نے کہا ’’ہم نے کچھ دن پہلے ضلع اور پولیس انتظامیہ سے ملاقات کی تھی اور ان سے تمام غیر قانونی قابضین کو ہٹانے کی درخواست کی تھی۔‘‘ سپرنٹنڈنٹ خان نے کہا، ایم بی ایچ کے رہائشیوں کو اتوار کو اطلاع دی گئی تھی کہ انہیں پیر کی دوپہر تک اپنے کمرے خالی کرنے ہوں گے۔ کارروائی (ہاسٹل سیل کرنا) ہماری درخواست کا نتیجہ ہے۔

پولیس کے پہنچنے پر ایم بی ایچ میں موجود تقریباً نصف درجن طلباء کو کمرے خالی کرنے کو کہا گیا۔ ہاسٹل کو الہ آباد یونیورسٹی کے منتخب فیکلٹی بشمول پراکٹر پروفیسر ہرش کمار کی موجودگی میں سیل کیا گیا۔ جو لوگ موجود نہیں تھے، ان کا سامان ان کے کمروں سے نہیں ہٹایا گیا۔ عرفان خان نے کہا کہ تمام طلبا کو 23 اپریل کو عید کے بعد آنے کو کہا گیا ہے۔ ہم ہر طالب علم کے کاغذات کی تصدیق کریں گے۔