ملک کے بیشتر علاقوں میں لو کی پیشگوئی

پونے: قومی دارالحکومت دہلی، مغربی اتر پردیش اور ہریانہ سمیت شمالی اور وسطی ہندوستان میں درجہ حرارت میں اضافے کے ساتھ ہی ملک کے بیشتر حصوں میں لو چلنے کے آثار ہیں۔ ہندوستانی محکمہ موسمیات کے مطابق اتوار کو مغربی مدھیہ پردیش اور ودربھ میں لو چلنے کے آثار ہیں۔ مغربی مدھیہ پردیش، ودربھ، مدھیہ مہاراشٹر، مغربی راجستھان اور گجرات کے کچھ حصوں میں شدید گرمی ریکارڈ کی گئی ہے۔ درجہ حرارت میں مسلسل اضافہ ہو رہا ہے اور باہری علاقوں میں درجہ حرارت 40 ڈگری سینٹی گریڈ تک پہنچ گیا ہے۔

دوسری جانب پہاڑی علاقے میں زیادہ سے زیادہ درجہ حرارت میں اضافے کے بعد لو کی کیفیت پیدا ہوگئی ہے۔ سمندری طوفان ’موچا‘ پورٹ بلیئر کے قریب بنا ہوا ہے۔ خلیج بنگال میں پیدا ہوا سمندری طوفان موچا انڈمان اور نکوبار جزائر کے پورٹ بلیئر کے شمال میں واقع ہے۔ امکان ہے کہ یہ اتوار کو شمال مشرق کی طرف بڑھے گا اور بنگلہ دیش کے کاکس بازار اور میانمار کے کوکو کے درمیان سے گزر سکتا ہے۔