رام پور ضمنی انتخاب میں دھاندلی کے الزامات پر الہ آباد ہائی کورٹ میں سماعت، بی جے پی کے رکن اسمبلی آکاش سکسینہ کو نوٹس جاری

الہ آباد: رام پور انتخاب میں بی جے پی پر دھاندلی کے الزام والی سماجوادی پارٹی کے امیدوار عاصم راجا کی عرضی پر الہ آباد ہائی کورٹ نے رام پور سے بی جے پی کے رکن اسمبلی آکاش سکسینہ کو نوٹس جاری کیا ہے۔ جسٹس سنجے کمار سنگھ کی بنچ نے طے کیا ہے کہ معاملہ کی آئندہ سماعت اگست کے پہلے ہفتے میں کی جائے گی۔

خیال رہے کہ رام پور اسمبلی سیٹ سماجوادی پارٹی کے قدآور لیڈر اور رکن اسمبلی اعظم خان کو ایک معاملہ میں سزا سنائے جانے کے بعد اسمبلی کے لیے نااہل قرار دینے کے بعد خالی ہوئی تھی۔ اس سیٹ پر عاصم راجا سماجوادی پارٹی کے امیدوار تھے جبکہ آکاش سکسینہ نے بی جے پی کے ٹکٹ پر الیکشن لڑا تھا۔ عاصم راجا کا الزام ہے کہ اس سیٹ پر ہونے والے انتخاب میں دھاندلی کی گئی ہے۔

راجا نے اپنی عرضی میں الزام عائد کیا کہ آکاش سکسینہ نے غلط طریقے سے الیکشن لڑا اور اقتدار کی طاقت کا استعمال کیا۔ انہوں نے الزام عائد کیا کہ آکاش سکسینہ اور مقامی پولیس نے کئی ووٹروں کو گھر سے باہر نکلنے اور ووٹ ڈالنے کی اجازت نہیں دی۔ راجا نے دعویٰ کیا کہ یہ تمام ووٹر انہیں کے حامی تھے۔ اس بنیاد پر راجا نے عدالت سے رکن اسمبلی کے طور پر سکسینہ کے انتخاب کو منسوخ کرنے کی درخواست کی ہے۔