یو پی میں شدید گرمی کے درمیان اسہال کے مریضوں کی تعداد میں اضافہ، بچوں کی کس طرح کریں حفاظت؟

لکھنؤ: اتر پردیش میں شدید گرمی کے درمیان اسہال (ڈائریا) کے مریضوں کی تعداد میں اضافہ ہوا ہے۔ اسہال کا یہ پھیلاؤ 15 سال تک کے بچوں میں زیادہ نظر آ رہا ہے۔ بروقت علاج اور مریض کی مناسب دیکھ بھال نہ کرنے کی صورت میں جان بھی جا سکتی ہے۔ ڈاکٹروں نے والدین کو صلاح دی ہے کہ وہ بچوں کا مناسب خیال رکھیں اور ایسی صورت حال پیدا نہ ہونے دیں کہ بچہ بیمار کا شکار ہو جائے۔ خیال رہے کہ بچوں میں لو لگنے کے بعد اسہال اور قے جیسی علامات ظاہر ہونا شروع ہو جاتی ہیں۔

بریلی میں ڈائریا کے مریضوں کی تعداد میں اضافہ ہوا ہے۔ یہاں کے ضلع اسپتال کی ڈاکٹر الکا شرما نے بتایا کہ گرمی اور باہر کا کھانا کھانے کی وجہ سے آج کل ڈائریا کے زیادہ مریض آ رہے ہیں۔ ان کا کہنا تھا کہ یہاں آنے والے بچوں کے لیے مکمل انتظامات کیے گئے ہیں، تمام بچے شفایاب ہو کر واپس جا رہے ہیں۔

اسہال کی علامات ظاہر ہونے پر کیا کریں؟

ڈاکٹر الکا شرما نے کہا ’’میں والدین سے درخواست کرتی ہوں کہ وہ بچوں کو باہر کا کوئی کھانا نہ کھلائیں بلکہ گھر کی تمام مائع چیزیں اور کھانا کھلائیں۔ جیسے ہی بچوں میں اسہال کی علامات نظر آئیں، انہیں زیادہ سے زیادہ پانی پلائیں۔ ان بچوں کو بھی زیادہ سے زیادہ پانی دیں جن میں علامات ظاہر نہیں ہو رہی ہوں۔ اس کے ساتھ بچوں کو فاسٹ فوڈ سے دور رکھیں۔ اس کے علاوہ فوری طور پر ڈاکٹر سے رابطہ کریں۔‘‘

اسہال کی بیماری سے نجات کب ملے گی؟

محکمہ موسمیات کے مطابق 25 مئی سے ایک ویسٹرن ڈسٹربنس ہریانہ میں اپنا اثر دکھائے گا۔ اس کے زیر اثر 26 سے 28 مئی تک ریاست کے بیشتر علاقوں میں وقفے وقفے سے آندھی اور گرج چمک کے ساتھ ہلکی سے درمیانی بارش کا امکان ہے۔ بعض مقامات پر تیز بارش بھی ہو سکتی ہے۔ اس دوران دن کے درجہ حرارت میں کمی آئے گی۔ جب گرمی میں کمی ہوگی تو لوگوں کو ڈائریا کی بیماری سے بھی راحت ملے گی۔