آر ایس ایس کے ’اکھنڈ بھارت‘ پر ہریش راوت کی نکتہ چینی، ’پڑوسی ممالک کو کس شکل میں ہندوستان میں شامل کریں گے!‘

ہریدوار: اتراکھنڈ کے سابق وزیر اعلیٰ ہریش راوت نے آر ایس ایس سربراہ موہن بھاگوت کے ’اکھنڈ بھارت‘ والے بیان پر کہا ہے نکتہ چینی کی ہے۔ ہریش راوت نے سوال کیا کہ سری لنکا، نیپال، برما، بنگلہ دیش اور پاکستان کو کس شکل میں ہندوستان میں جوڑنا چاہتے ہیں، یہ موہن بھاگوت ہی بتا سکتے ہیں۔

خیال رہے کہ گزشتہ روز موہن بھاگوت نے ایک تقریب سے خطاب کرتے ہوئے کہا تھا کہ ہندوستان کو اگلے 15 سالوں میں متحد (اکھنڈ بھارت) بنایا جا سکتا ہے۔ انہوں نے کہا کہ ملک کو اکھنڈ بھارت بننے سے کوئی نہیں روک سکتا اور جو بھی اس کی راہ میں آئے گا وہ فنا جائے گا۔

ہریش راوت نے اپنے بیان میں کہا کہ ’سناتن دھرم‘ نامتناہی دور سے چلا آ رہا ہے اور یہ ہمیشہ انتہا پسندی کے خلاف رہا ہے۔ سابق وزیر اعلیٰ نے کہا کہ ویواکانند نے شیکاگو میں کہا تھا کہ ان کا مذہب سناتن اور اعتدال پسند ہے۔ سب کو ساتھ لے کر چلتا ہے۔ وسودھیو کٹومبکم (ساری دنیا ایک خاندان ہے) کے نظریہ کی بات کرتا ہے۔ کانگریس اسی پر عمل پیرا ہے۔

ہریش راوت جمعرات کے روز دو روزہ ہریدوار کے دورے پر پہنچے تھے۔ وی آئی پی گھاٹ پر گنگا پوجا کرنے کے بعد انہوں نے دکش مندر میں دیوتا شیو پر جل چڑھایا۔ اتراکھنڈ کی سیاسی ہلچل کے درمیان کچھ پارٹی لیڈران کی جانب سے لگ رہے الزامات پر ہریش راوت نے کہا کہ ان کا سوال پوچھنا لازمی ہے۔ اتراکھنڈ اسمبلی میں وہ پارٹی کو جیت نہیں دلا پائے، اس لئے لیڈران ان پر زبانی حملے نہیں کریں گے تو اور کس پر کریں گے!