اتر پردیش کے للت پور میں بارش کے ساتھ ایک گھنٹے تک ژالہ باری، سڑکوں پر بچھ گئی سفید چادر، فصلیں تباہ

ایک بار پھر کسانوں پر قدرت کی مار پڑی ہے۔ بے موسم کی بارش اتر پردیش کے للت پور میں کسانوں کے لیے آفت بن کر آئی ہے۔ ژالہ باری سے فصلوں کو نقصان ہوا ہے جس سے کسان افسردہ ہیں۔ مقامی لوگوں کا کہنا ہے کہ "ایک گھنٹے سے زیادہ ژالہ باری ہونے سے فصل پوری خراب ہو گئی ہے۔ کسان ایسے ہی قرض میں ہے اور اب ژالہ باری سے فصل پوری طرح خراب ہو گئی ہے۔ کسان پہلے ہی قرض میں ڈوبے ہیں اور اب یہ ژالہ باری۔ ہم حکومت سے چاہتے ہیں کہ وہ ہماری کچھ مدد کریں۔"

میڈیا رپورٹس کے مطابق کئی جگہ بارش کے سبب گیہوں اور جو کی فصل گر کر کھیتوں میں بچھ گئی اور چنے کی پھلی بھی جھڑ گئی۔ بے موسم بارش سے اپنے ارمان ٹوٹتے دیکھ کر کئی کسان کی آنکھوں میں آنسو آ گئے۔ وہ اپنی معاشی پریشانی کو لے کر کافی پریشان دکھائی دیئے۔

واضح رہے کہ جمعہ کو صبح سے ہی آسمان میں بادل چھائے رہنے سے کسانوں کی فکر بڑھ گئی۔ کسان کھیتوں میں تیزی سے کام نمٹانے میں مصروف رہے۔ اس دوران دوپہر بعد تیز ہواؤں کے ساتھ ہوئی بارش اور ژالہ باری نے کھیتوں میں کھڑی اور کٹی ہوئی فصلوں کو تباہ و برباد کر دیا۔

محکمہ موسمیات کا اندازہ ہے کہ آئندہ چار دن یعنی 22 مارچ تک یوپی کا موسم ایسا ہی الٹ پھیر والا رہے گا۔ جمعہ کو 36.5 ڈگری سلسیس کے ساتھ وارانسی سب سے گرم ضلع رہا ہے۔ دوسری طرف 16.3 ڈگری سلسیس کے ساتھ بریلی سب سے ٹھنڈا شہر ریکارڈ کیا گیا۔ آج صبح بھی کانپور، سہارنپور میں ہلکی بارش ہوئی۔ علاوہ ازیں لکھنؤ، آگرہ، پریاگ راج، ایودھیا میں بادل چھائے ہوئے ہیں۔

محکمہ موسمیات نے ریاست کے جن 33 شہروں کے لیے بارش اور ژالہ باری کا الرٹ جاری کیا ہے ان میں سیتاپور، شاہجہاں پور، بارابنکی، کوشامبی، پریاگ راج، سونبھدر، مرزاپور، بھدوہی، بستی، سدھارتھ نگر، گونڈا، بلرامپور، شراوستی، بہرائچ، شاملی، مظفر نگر، باغپت، میرٹھ ہیں۔ اس کے علاوہ غازی آباد، گوتم بدھ نگر، علی گڑھ، متھرا، آگرہ، ہاتھرس، فیروز آباد، مین پوری، بجنور، مراد آباد، رامپور، بریلی، پیلی بھیت، بلند شہر، باندہ شامل ہیں۔ ان ضلعوں میں سے 50 کلومیٹر فی گھنٹے کی رفتار سے ہوائیں بھی چلیں گی۔