گجرات اسمبلی انتخاب: ’مجھے نہیں لگتا کہ عآپ ایک بھی سیٹ جیت پائے گی‘، امت شاہ کا دعویٰ

گجرات اسمبلی انتخاب کے پیش نظر اب سبھی امیدواروں کی دھڑکنیں تیز ہو گئی ہیں۔ پہلے مرحلے کی ووٹنگ یکم دسمبر یعنی کل ہونے والی ہے اور دوسرے مرحلے کی ووٹنگ آئندہ 5 دسمبر کو ہوگی۔ اس درمیان مرکزی وزیر داخلہ اور بی جے پی کے سرکردہ لیڈر امت شاہ نے ایک ایسا دعویٰ کیا ہے جو عام آدمی پارٹی (عآپ) کے لیے فکر انگیز ہے۔ انھوں نے اپنے ایک بیان میں کہا ہے کہ ’’ہر پارٹی کو انتخاب لڑنے کا حق حاصل ہے، لیکن یہ لوگوں پر منحصر ہے کہ وہ کس پارٹی کو قبول کرتے ہیں اور کس پارٹی کو مسترد کرتے ہیں۔ جہاں تک گجراتی عوام کی بات ہے تو ان کے دماغ میں عآپ کہیں بھی نہیں ہے۔‘‘

گجرات اسمبلی انتخاب میں عآپ کی کارکردگی سے متعلق پیشین گوئی کرتے ہوئے امت شاہ کا کہنا ہے کہ ’’انتخابی نتائج کا انتظار کیجیے، شاید کامیاب امیدواروں کی فہرست میں عآپ کا نام نہ آئے۔‘‘ کانگریس کے تعلق سے امت شاہ نے کہا کہ ’’یہ اب بھی اہم اپوزیشن پارٹی ہے، لیکن پارٹی بحران کے دور سے گزر رہی ہے اور اس کا اثر گجرات میں بھی دکھائی دے رہا ہے۔‘‘

امت شاہ نے اپنے مذکورہ بالا خیالات کا اظہار نیوز ایجنسی پی ٹی آئی کو دیئے گئے ایک انٹرویو میں کیا ہے۔ انھوں نے انٹرویو کے دوران گزشتہ کچھ سالوں میں لوگوں کے ذریعہ بار بار بی جے پی میں اعتماد ظاہر کرنے کی اصل وجہ وزیر اعظم نریندر مودی کی مقبولیت اور گجرات کے وزیر اعلیٰ کی شکل میں ان کے دور میں ہوئی گجرات کی ترقی کو بتایا۔ انھوں نے امید ظاہر کی کہ بی جے پی گجرات میں اس بار بھی بے مثال جیت درج کرے گی۔