کورونا کی وبا ابھی ختم نہیں ہوئی، غفلت میں ہے حکومت: راہل گاندھی

نئی دہلی: ہندوستان میں کورونا وائرس کی جنوبی افریقہ اور برازیل میں سامنے آنے والی نئی اقسام کے داخل ہونے کے بعد ایک مرتبہ پھر سے احتیاط برتی جانے لگی ہے۔ دریں اثنا، کانگریس کے رہنما راہل گاندھی نے ایک بار پھر مرکزی حکومت پر غفلت برتنے کا الزام عائد کیا ہے۔

انڈیا ٹوڈے کی ایک خبر کو ٹوئٹ کرتے ہوئے کانگریس رہنما راہل گاندھی نے کہا کہ حکومت ہند کورونا کیس میں انتہائی غفلت برت رہی ہے اور خوش فہمی کا مظاہرہ کر رہی ہے۔ کانگریس کے رکن پارلیمنٹ راہل گاندھی نے اپنے ٹوئٹ میں لکھا ہے کہ کورونا کی وبا ابھی ختم نہیں ہوئی ہے۔

کانگریس کے رکن پارلیمنٹ راہل گاندھی وقتاً فوقتاً مرکزی حکومت کو کورونا بحران کے حوالہ سے ہدف تنقید بنا رہے ہیں۔ راہل گاندھی اب تک لاک ڈاؤن، کورونا ویکسین اور مرکز و ریاستوں کے مابین تال میل سمیت کئی معاملوں میں حکومت پر نشانہ لگا چکے ہیں۔

خیال رہے کہ گزشتہ روز مرکزی وزارت صحت نے اس بات کی تصدیق کی ہے کہ جنوبی افریقہ اور برازیل کی کورونا وائرس کی اقسام ہندوستان میں داخل ہوگئی ہیں۔ ہندوستان میں جنوبی افریقہ کی قسم کے چار معاملے اور برازیل کی قسم کے ایک معاملہ کی تصدیق ہوئی ہے۔ کورونا وائرس کے بحران کے بارے میں بات کریں تو کورونا کی نئی اقسام جنوبی ریاستوں میں پائی گئی ہیں۔ ہندوستان میں اس سے قبل برطانیہ کی کورونا کی قسم کے کیسز کی بھی تصدیق کی جا چکی ہے۔

اب جنوبی افریقہ اور برازیل کی کورونا کی نئی قسم پائے جانے کے بعد کرناٹک میں سختی بڑھا دی گئی ہے۔ افریقہ - برازیل سے آنے والے لوگوں کے لئے اب بنگلور ایئرپورٹ پر آر ٹی پی سی آر ٹیسٹ کروانا لازمی ہے۔ نیز، اگر کوئی مثبت پایا جاتا ہے تو، اسے 14 دن تک قرنطین میں رہنا پڑے گا اور اس کا نمونہ جینوم سیکوینسنگ کے لئے بھیجا جائے گا۔