غازی آباد ڈسٹرکٹ مجسٹریٹ کورونا مثبت، ’جی ڈی اے‘ کے وی سی کو اضافی ذمہ داری

غازی آباد: قومی دارالحکومت سے متصل غازی آباد کے ضلع مجسٹریٹ اجے شنکر پانڈے کے کورونا وائرس (کووڈ-19) سے متاثر ہونے کی تصدیق ہوگئی ہے۔ فی الحال ڈسٹرکٹ آفیسر کا چارج غازی آباد ڈیولپمنٹ اتھارٹی کے وائس چیئرمین، کرشنا کرونیش کو سونپا گیا ہے۔

شنکر پانڈے ضلع میں کورونا وائرس سے بچاؤ کے لئے روزانہ میٹنگ کر رہے تھے۔ اس کے علاوہ وہ غازی آباد میں اسپتالوں کا بھی معائنہ کر رہے تھے۔ ہفتہ کے روز ان کی طبیعت اچانک خراب ہوگئی تھی۔ انہیں بخار تھا، لیکن دوائیں لینے کے باوجود ان کی صحت میں کوئی بہتری نہیں آئی۔ ٹسٹ کے بعد ان کی کورونا رپورٹس مثبت آئی ہے۔

غازی آباد اتھارٹی کے وی سی کرشنا کرونیش اس وقت تک ان کا چارج سنبھالیں گے جب تک کہ ڈسٹرکٹ مجسٹریٹ شنکر پانڈے کورونا وائرس سے ٹھیک نہیں ہوجاتے ہیں۔ وہ ضلع میں کورونا سے بچاؤ کے لئے اقدامات کرسکتے ہیں ۔ تاہم ضلع انتظامیہ اپنے تمام کاموں کو ڈسٹرکٹ مجسٹریٹ اجے شنکر پانڈے کو آگاہ کرتی رہے گی۔

خیال رہے ہفتے کے روز ضلع غازی آباد میں کورونا وائرس کے 585 نئے کیسز کی تصدیق ہوگئی۔ اسی دوران ضلع میں مزید 10 افراد ہلاک ہوگئے ہیں۔ ضلع غازی آباد میں اب تک 138 افراد کورونا سے مر چکے ہیں۔ اس کے علاوہ ، ضلع میں کورونا وائرس کے 5841 فعال کیسز ہیں۔ جن کا مختلف اسپتالوں میں علاج جاری ہے۔ شنکر پانڈے کے دیگر رشتہ دار بھی کورونا انفیکشن کی لپیٹ میں ہیں جن کا علاج چل رہا ہے۔ سب کا علاج چیف میڈیکل آفیسر کی نگرانی میں کیا جا رہا ہے۔