پنجاب کے سابق اے ڈی جی پی گرِندر سنگھ ڈھلون کانگریس میں شامل

سابق آئی پی ایس اور پنجاب کے سابق اے ڈی جی پی گرِندر سنگھ ڈھلون نے آج (30 اپریل) کانگریس پارٹی میں شمولیت اختیار کرلی۔ انہوں نے نئی دہلی میں کانگریس ہیڈکوارٹر میں پارٹی کی رکنیت حاصل کی۔ گرِندرسنگھ ڈھلون کے کانگریس پارٹی میں شامل ہوتے وقت پنجاب کانگریس کے انچارج دیویندر یادو موجود تھے۔

پارٹی میں شمولیت کے اس موقع پر سابق آئی پی ایس گرِندرسنگھ ڈھلون کی اہلیہ اور اہل خانہ کے دیگر افراد بھی موجود تھے۔ آئی اے این ایس کی خبر کے مطابق پنجاب کی فیروز پور سیٹ سے گرِندرسنگھ ڈھلون کو امیدوار بنایا جا سکتا ہے۔ گرِندرسنگھ ڈھلون نے کچھ دن پہلے ہی وی آر ایس کے لیے درخواست دی تھی جسے پنجاب حکومت نے منظور کر لیا تھا۔ وی آر ایس کی منظوری کے چھ دن بعد انہوں نے کانگریس پارٹی میں شمولیت اختیار کر لی۔

کانگریس پارٹی میں شامل ہونے کے بعد گرِندرسنگھ ڈھلون نے کہا کہ پارٹی ہائی کمان انہیں جو بھی ذمہ درای سونپے گی، وہ اسے پوری لگن اور توجہ کے ساتھ پوری کریں گے۔ کانگریس کے پنجاب انچارج دیویندر یادو نے اس موقع پر کہا کہ پنجاب کے سابق اے ڈی جی پی گرِندرسنگھ ڈھلون 1997 بیچ کے آئی پی ایس افسر ہیں۔ یادو کے مطابق ڈھلون نے پنجاب میں دہشت گردی اور بہت سے مشکل حالات سے نمٹنے میں اپنی بہترین کارکردگی دکھائی ہے۔

واضح رہے کہ گرِندرسنگھ ڈھلون کے پاس پنجاب پولیس میں اسپیشل اے ڈی جی پی لاء اینڈ آرڈر کا چارج تھا۔ وہ ریاست میں امن وامان کے قیام کے حوالے سے جانے جاتے ہیں۔ وی آر ایس حاصل لینے کے بعد انہوں نے سوشل میڈیا پلیٹ فارم پر ایک پوسٹ کے ذریعے کہا تھا کہ وی آر ایس حاصل کرنے کے بعد وہ پنجرے سے آزاد محسوس کر رہے ہیں۔ انہوں نے 30 سال تک محکمہ پولیس میں اپنے فرائض انجام دیئے۔