پنجاب میں بین الاقوامی سرحد پر تصادم، پانچ درانداز ہلاک

ترن تارن: پنجاب میں بی ایس ایف نے بڑی کارروائی کو انجام دیا ہے۔ میڈیا رپورٹ کے مطابق ترن تارن کے کھیم کرن میں پاکستان کے پانچ درندازوں کو بی ایس ایف کے جوانوں نے مار گرایا ہے۔ کہا جا رہا ہے کہ یہ درانداز پنجاب میں منشیات پہنچانے کے ارادے سے سرحد پار کر رہے تھے۔

بی ایس ایف کے اعلی افسر نے بتایا کہ سیکورٹی دستوں نے سرحد کے نزدیک کچھ لوگوں کی مشتبہ سرگرمیاں دیکھی اور انہیں للکارا جس کے بعد دراندازوں نے فائرنگ شروع کردی۔ سیکورٹی دستوں نے بھی جوابی کارروائی میں فائرنگ کی، جس کے نتیجہ میں مڈبھیڑ میں پانچ درانداز مارے گئے۔

انہوں نے بتایا کہ سرحد پر اونچی جنگلی گھاس کا فائدہ اٹھا کر درانداز ہندوستانی سرحد میں داخل ہونے کی کوشش کر رہے تھے۔ انہوں نے بتایا کہ جائے وقوع پر ابھی تفتیش جاری ہے۔ واضح رہے کہ کھیم کرن پنجاب کے ترن تارن ضلع میں واقع ہے جوکہ سرحد سے ملحقہ علاقہ ہے۔ بتایا جاتا ہے کہ ایک درانداز سے اسالٹ رائفل بھی برآمد ہوئی ہے۔

خیال رہے کہ پنجاب میں منشیات کا کاروبار بڑے پیمانے پر پھیلا ہوا ہے اور ریاست کا ایک بڑا نوجوان طبقہ اس کی زد میں ہے۔ الزام ہے کہ منشیات کی بیشتر مقدار ہمسایہ ملک پاکستان سے ہی پنجاب تک پہنچتی ہے۔ ریاستی حکومت اس پر روک لگانے کی پرزور کوشش کر رہی ہے اس کے باوجود نشہ کے کاروباری نوجوانوں میں موت بانٹ رہے ہیں۔