وشاکھاپٹنم ریلوے اسٹیشن پر کوربا ایکسپریس کے تین ڈبوں میں آتشزدگی، کوئی جانی نقصان نہیں ہوا

آندھرا پردیش کے وشاکھاپٹنم ریلوے اسٹیشن پر اس وقت ایک بڑا حادثہ ہونے سے ٹل گیا جب کوربا-وشاکھاپٹنم ایکسپریس کے 3 ڈبوں میں آگ بھڑک اٹھی۔ راحت کی بات ہے کہ اس وقت ٹرین کے سبھی ڈبے مسافروں سے خالی تھے۔ خبررساں ایجنسی اے این آئی کے مطابق ٹرین کی بوگیوں میں آگ لگنے کی اطلاع ملتے ہی مقامی فائر بریگیڈ دستہ نے فوراً کارروائی کرتے ہوئے اسے بجھا دیا۔ یہ واقعہ صبح 10 بجے پیش آیا۔ آخری اطلاع موصول ہونے تک آگ لگنے کی اصل وجہ کا پتہ نہیں چل سکا تھا۔

وشاکھاپٹنم کے پولیس کمشنر شنکر برت باگچی نے بتایا کہ صبح 7.30 بجے وشاکھاپٹنم ریلوے اسٹیشن پر کھڑی کوربا-وشاکھاپٹنم ایکسپریس کے 3 ڈبوں میں آگ لگ گئی۔ خوش قسمتی سے اس وقت ان ڈبوں میں کوئی بھی مسافر موجود نہیں تھا، جس سے کسی بھی شخص کو کوئی نقصان نہیں پہنچا اور ایک بڑا حادثہ ہونے سے ٹل گیا۔

مقامی فائر بریگیڈ افسران نے فوراً کارروائی کی اور ٹرین کی آگ کو پھیلنے سے روک دیا۔ افسر نے کہا، ’’ہم ایف آئی آر درج کرا رہے ہیں۔ آگ لگنے کے پیچھے کی وجہ کا پتہ لگانے کے لیے فارینسک ماہرین کو بلایا گیا ہے۔ آگ کا سبب شارٹ سرکٹ یا کوئی دیگر وجہ ہو سکتی ہے۔ جائے وقوع سے فارینسک ثبوت یکجا کرنے اور ان کی جانچ کرنے کے بعد ہی اس واقعہ کے پیچھے کی حقیقت سامنے آ سکے گی۔‘‘

والٹئر ڈویژن کے ڈی آر ایم سوربھ پرساد نے بتایا کہ ان خالی ڈبوں کو رکھ رکھاؤ کے لیے کوچنگ ڈپو جانا تھا۔ اسے یہاں پلیٹ فارم پر رکھا گیا تھا اور صبح 9 بجے کے قریب پلیٹ فام پر گشت کر رہے آر پی ایف ملازمین نے تھوڑا دھواں دیکھا۔ انہوں نے فوراً فائر بریگیڈ اور اسٹیشن پر موجود ملازمین کو اطلاع دی۔