کسانوں نے کی ہریانہ کے وزیر داخلہ انل وِج کے قافلہ کی مخالفت، خوب ہوا ہنگامہ

متنازعہ زرعی قوانین کے خلاف کسانوں کا مظاہرہ جاری ہے اور کئی ریاستوں میں بی جے پی وزراء کو ناراض کسانوں کا لگاتار سامنا کرنا پڑ رہا ہے۔ ایسا ہی کچھ انبالہ میں دیکھنے کو ملا جہاں زرعی قوانین کے خلاف مظاہرہ کر رہے کسانوں نے بدھ کی دیر شب ہریانہ کے وزیر داخلہ کے قافلہ کی مخالفت کی اور پھر جمعرات کی صبح اس تعلق سے ایک ہنگامہ کی حالت پیدا ہو گئی۔ پولیس کے ذریعہ کئی کسانوں کو حراست میں لیا گیا ہے اور انھیں بس سے پولیس لائن لے جانے کی خبریں موصول ہو رہی ہیں۔

میڈیا ذرائع سے موصول ہو رہی خبروں کے مطابق انل وِج دیر رات چندر پوری میں اپنے پی اے اجے کا حال چال جاننے پہنچے تھے جب کچھ لوگوں نے ان کے قافلے کی مخالفت میں آواز اٹھانی شروع کر دی۔ معاملہ اس وقت بگڑ گیا جب پولیس نے ایک نوجوان کو حراست میں لے لیا۔ اس کے بعد رات میں ہی کئی لوگوں نے انبالہ-دہلی شاہراہ کو جام کر دیا۔ کسی طرح راستہ کھلوایا گیا، لیکن جمعرات کی صبح لوگوں نے پھر سے شاہراہ پر ہنگامہ شروع کر دیا۔ موقع پر پہنچی پولیس ان لوگوں کو گاڑی میں بٹھا کر انبالہ شہر لے گئی۔ دوسری طرف پولیس نے انل وِج کی رہائش پر سیکورٹی سخت کر دی گئی ہے تاکہ کوئی ناخوشگوار واقعہ پیش نہ آئے۔