آبکاری گھوٹالہ کیس: 17 ماہ بعد سابق نائب وزیر اعلیٰ منیش سسودیا تہاڑ جیل سے رِہا، عآپ میں جشن کا ماحول

دہلی کے سابق نائب وزیر اعلیٰ منیش سسودیا 17 ماہ بعد تہاڑ جیل سے رِہا ہو گئے۔ سپریم کورٹ نے انھیں آج دن میں ہی ضمانت پر رِہا کرنے کا فیصلہ سنایا تھا، اور شام میں جب وہ جیل سے باہر نکلے تو عآپ لیڈران و کارکنان کی زبردست بھیڑ ان کا استقبال کرنے کے لیے کھڑی ہوئی تھی۔ دہلی آبکاری معاملے میں ملزم منیش سسودیا کو سی بی آئی نے 26 فروری 2023 کو گرفتار کیا تھا، پھر اس کے بعد منی لانڈرنگ کے الزامات میں ای ڈی نے 9 مارچ 2023 کو انھیں گرفتار کیا تھا۔

جیل سے باہر آنے کے بعد منیش سسودیا نے کہا کہ ’’میں سپریم کورٹ کا دل سے شکریہ ادا کرتا ہوں۔ جب سے میں نے عدالت کا حکم سنا ہے، میرے وجود کا ہر حصہ بابا صاحب کا قرضدار ہو گیا ہے۔ تاناشاہ نے خواب دیکھا تھا کہ پورے اپوزیشن کو اندر ڈالیں گے، لیکن یہ آئین کی طاقت ہے۔ اسی آئین کی طاقت سے اروند کیجریوال بھی باہر آئیں گے۔‘‘ انھوں نے لوگوں کی بھیڑ کے سامنے ’جیل کے تالے ٹوٹیں گے، اروند کیجریوال چھوٹیں گے‘نعرہ بھی بلند کیا۔

آج جب سسودیا تہاڑ جیل سے چھوٹے تو انھیں لینے کے لیے پارٹی لیڈر اور راجیہ سبھا رکن سنجے سنگھ پہنچے تھے۔ سسودیا کی ایک جھلک پانے کے لیے جیل کے باہر بڑی تعداد میں عآپ لیڈران و کارکنان موجود تھے۔ سبھی نے ’زندہ باد‘ کے نعروں سے سسودیا کا استقبال کیا۔ منیش سسودیا ہوا میں ہاتھ لہرا کر سبھی کا استقبال کرتے ہوئے دکھائی دیے۔

واضح رہے کہ جیل سے چھوٹنے کے بعد منیش سسودیا کا شیڈول بہت مصروف ہے۔ وہ وزیر اعلیٰ اروند کیجریوال کی بیوی سنیتا کیجریوال اور ان کے والدین سے ملنے کے لیے گھر پہنچنے والے ہیں۔ ہفتہ کی صبح 9.30 بجے وہ راج گھاٹ جائیں گے، اور پھر 10 بجے کناٹ پلیس کے ہنومان مندر، اور پھر 11 بجے عآپ دفتر پہنچ کر لیڈران و کارکنان سے خطاب کریں گے۔