آبکاری پالیسی گھوٹالہ: منیش سسودیا کی عدالتی حراست میں مزید 14 دنوں کی توسیع، عدالت سے آج بھی نہیں ملی راحت

دہلی کے سابق نائب وزیر اعلیٰ منیش سسودیا کی پریشانی کم ہونے کا نام نہیں لے رہی ہے۔ 17 اپریل کو راؤز ایوینیو کورٹ نے ایک بار پھر آبکاری پالیسی گھوٹالہ معاملے میں منیش سسودیا کی حراست کو 14 دنوں کے لیے بڑھانے کا فیصلہ سنایا ہے۔ یعنی اب وہ آئندہ یکم مئی تک عدالتی حراست میں ہی رہیں گے۔

خبر رساں ایجنسی اے این آئی کے مطابق دہلی کی نئی آبکاری پالیسی میں مبینہ بے ضابطگیوں کو لے کر ای ڈی کی طرف سے درج کیے گئے معاملے میں ان کی حراست کو بڑھانے کا حکم راؤز ایوینیو کورٹ کے ذریعہ جاری کیا گیا ہے۔ اسی کے ساتھ عدالت نے سی بی آئی کی طرف سے درج معاملے میں بھی منیش سسودیا کی حراست کو یکم مئی تک بڑھا دیا ہے۔

میڈیا رپورٹس کے مطابق آبکاری پالیسی گھوٹالہ معاملے میں منیش سسودیا کے ساتھ ساتھ ملزم ارون رام چندر پلئی اور امن دیپ ڈھل کی عدالت میں حراست میں بھی توسیع کی گئی ہے۔ عدالت نے ای ڈی کی طرف سے درج کیے گئے معاملے میں ارون پلئی اور امن دیپ ڈھل کی عدالتی حراست 29 اپریل تک بڑھا دی ہے۔

بہرحال، اب منیش سسودیا کی ساری امیدیں 18 اپریل یعنی کل عدالت میں ضمانت عرضی پر ہونے والی سماعت پر مرکوز ہیں۔ ضمانت عرضی پر منگل کے روز عدالت میں سماعت ہوگی اور منیش سسودیا کے وکیل پورا زور لگائیں گے کہ انھیں ضمانت مل جائے اور جیل سے باہر آنے کا راستہ ہموار ہو جائے۔