یو پی: کانگریس کے ہر ضلع انچارج کو 20 دن ضلع میں قیام کرنا ہوگا، پرینکا گاندھی کا حکم

لکھنؤ: کانگریس جنرل سکریٹری پرینکا گاندھی نے پارٹی عہدیداروں کو تنظیم کی مضبوطی کے لئے اضلاع میں 3جنوری سے 20 دنوں تک قیام کرنے کی ہدایت دی ہے۔ اترپردیش کانگریس کی مجلس عاملہ کی میٹنگ سے آن لائن خطاب کرتےہوئے پرینکا گاندھی نے جمعرات کو کہا کہ ’’سبھی عہدیداروں کی پہلی ذمہ داری تنظیم کی تعمیر ہے۔اس کے لئے ہر فرد کو جس ضلع کا وہ انچارج ہے اسی ضلع میں قیام کر کے کام کرنا ہوگا۔‘‘

پرینکا گاندھی نے کہا کہ سبھی عہدیدار اپنے اپنے اضلاع میں 20دنوں تک قیام کریں گے اور اس دوران وہ تنظیم کو مضبوطی فراہم کرنے کے لئے ضروری اقدام کریں گے۔ عہدیداروں کے قیام کا پروگرام تین جنوری سے شروع ہوگا ۔انھوں نے مزید کہا کہ عہدیداروں کو پوری دلجمعی سے تنظیم کو مضبوط بنانے کے لئے اقدام کرنا ہوگا۔ پرینکا گاندھی نے بتایا کہ تنظیم سازی مہم کو مزید تیز کرنے کی مہم تیز سے تیز تر ہوچکی ہے۔ مہم کے تحت ابھی تک بلاکوں کی تشکیل مکمل ہوچکی ہے اور نیائے پنچایت سطح پر تنظیم سازی کا کام کرنا ہے۔

موصولہ اطلاعات کے مطابق پارٹی کے ریاستی صدر اجے کمار للو کی صدارت میں ہوئی میٹنگ میں کانگریس کے ہر ایک عہدیدار کو ایک ایک ضلع کی کمان سونپی گئی ہے، جنہیں اس ضلع میں رہ کر تنظیم کو مضبوط کرنے اور تنظیمی کاموں کو مزید رفتار دینے کے لئے کام کرنا ہوگا۔

میٹنگ کے دوسرے مرحلے میں ریاستی کانگریس کے ضلع اور شہر صدور کی میٹنگ ہوئی جس میں 28 دسمبر کو کانگریس کے یوم تاسیس کو اضلاع میں پوری تیاری کے ساتھ منائے جانے اور کانگریس سندیش پد یاترا نکالے جانے کی ہدایت ریاستی صدر اجے للو نے دی۔