آج ممبئی میں اسکول بند رہیں گے، محکمہ موسمیات کے ریڈ ایلرٹ کے بعد بی ایم سی کا فیصلہ

بدھ یعنی25 ستمبر کو ہونے والی موسلادھار بارش کی وجہ سے ممبئی میں کئی مقامات پر پانی جمع ہوگیا۔ اس کے علاوہ محکمہ موسمیات نے جمعرات کے لیے ریڈ الرٹ بھی جاری کیا ہے۔ اس کے پیش نظر بی ایم سی نے آج یعنی 26 ستمبر کو اسکول کی چھٹی کا اعلان کیا ہے۔

اس سے پہلے 25 ستمبر کو ممبئی کے پوائی میں رات 9 بجے تک سب سے زیادہ 257.8 ملی میٹر بارش ریکارڈ کی گئی تھی۔ مانخرد میں 239 ملی میٹر ریکارڈ بارش ہوئی ۔وکرولی، جوگیشوری، اندھیری میں بھی موسلادھار بارش ریکارڈ کی گئی۔

معلومات دیتے ہوئے، بی ایم سی نے کہا کہ محکمہ موسمیات نے ممبئی کے لیے جمعرات کی صبح 8.30 بجے تک ریڈ ایلرٹ جاری کیا ہے۔ اس کے پیش نظر طلباء کی حفاظت کو مدنظر رکھتے ہوئے ممبئی کے تمام اسکولوں اور کالجوں میں 26 ستمبر 2024 کو چھٹی کا اعلان کیا گیا ہے۔ بامبے میونسپل کارپوریشن (بی ایم سی) انتظامیہ نے ممبئی والوں سے درخواست کی ہے کہ وہ صرف ضروری ہونے پر ہی اپنے گھر چھوڑ دیں۔

واضح رہے کہ ہندوستان کے محکمہ موسمیات نے بدھ کی شام ممبئی اور اس کے پڑوسی اضلاع کے لیے ریڈ ایلرٹ جاری کرتے ہوئے موسلادھار بارش کی پیشن گوئی کی تھی۔ شہر کے کئی علاقوں میں دوپہر سے بارش ہو رہی ہے۔ میونسپل کارپوریشن کے ایک اہلکار نے بتایا کہ آئی ایم ڈی یعنی محکمہ موسمیات  نے ممبئی کے لیے اورنج ایلرٹ کو ریڈ ایلرٹ میں تبدیل کر دیا ہے، جو آج صبح 8.30 بجے تک جاری کیا گیا ہے۔

اس سے قبل بدھ کی شام ہونے والی موسلادھار بارش کے بعد ممبئی میں کئی مقامات پر پانی جمع ہوگیا جس کی وجہ سے سڑکوں پر گاڑیوں کی لمبی قطاریں لگ گئیں۔ خراب موسم کے پیش نظر کئی پروازوں کا رخ بھی موڑنا پڑا۔