دلیپ صاحب آنے والی نسلوں کے دلوں میں ’شہزادے‘ کے طور پر زندہ رہیں گے: ڈاکٹر منموہن سنگھ

نئی دہلی: ہندوستان کے سابق وزیر اعظم ڈاکٹر منموہن سنگھ نے شہنشاہ جذبات دلیپ کمار کے انتقال پر گہرے رنج و غم کا اظہار کرتے ہوئے ان کی اہلیہ سائرہ بانو کو تعزیتی مکتوب ارسال کیا ہے۔ منموہن سنگھ نے کہا کہ دلیپ صاحب ہندوستانی سنیما کے ایک ایسے لیجنڈ تھے جو ہندی سنیما کے پرستاروں کی آنے والی نسلوں کے دلوں میں شہزادے کے طور پر زندہ رہیں گے۔ اس سے قبل کانگریس کی صدر سونیا گاندھی نے بھی سائرہ بانو کے نام اپنے پیغام میں تعزیت کا اظہار کیا تھا۔

سائرہ بانو کے نام اپنے تعزیتی پیغام میں ڈاکٹر منموہن سنگھ نے لکھا، ہمارے پیارے دلیپ کمار کے سانحہ ارتحال کی خبر میرے لئے انتہائی تکلیف دہ ہے۔ دلیپ کمار صاحب، جنہیں بڑے پیار سے سنیما کے ’ٹریجڈی کنگ‘ اور ’دی فرسٹ خان‘ کے القاب سے نوازا جاتا تھا، انہیں ہندوستانی سنیما میں منفرد اداکاری متعارف کرانے کے لئے جانا جاتا تھا۔ انہوں نے جہاں سب سے زیادہ ’بہترین اداکار‘ کے فلم فیئر ایوارڈز حاصل کرنے کا ریکاڈ قائم کیا، وہیں وہ اس ایورڈ کو حاصل کرنے والے پہلے شخص بھی تھے۔

انہوں نے مزید کہا دلیپ صاحب ہندوستانی سنیما کے ایک ایسے لیجنڈ تھے جو ہندی سنیما کے پرستاروں کی آنے والی نسلوں کے دلوں میں شہزادے کے طور پر زندہ رہیں گے۔ دلیپ کمار صاحب ہندی سنیما کی تاریخ کے وہ عظیم ترین اداکار تھے جنہوں نے ایک ہندوستانی اداکار کے طور پر سب سے زیادہ ایوارڈز حاصل کرنے کا گنیز بک ریکارڈ قائم کیا۔

منموہن سنگھ نے کہا کہ سنیما کے لئے ان کی خدمات کو حکومت ہند نے بھی تسلیم کرتے ہوئے انہیں پدم وبھوشن سے سرفراز کیا تھا جوکہ ہندوستان کا دوسرا سب سے اعلیٰ شہری اعزاز ہے۔ ان کی سنیما کے لئے کی گئیں خدمات کو ملک اور دنیا کے تمام ہندی فلموں کے پرستار ہمیشہ یاد رکھیں گے۔

ڈاکٹر منموہن سنگھ نے آخر میں اہلیہ گرشرن کور اور اپنی طرف سے سائرہ بانوں اور ان کے اہل خانہ کو دلی تعزیت پیش کرتے ہوئے کہا کہ خدا آپ کو اس ناقابل تلافی نقصان کو برداشت کرنے کا حوصلہ اور صبر سے نوازے۔