دہلی شراب گھوٹالہ: کے کویتا کی عبوری ضمانت کی درخواست مسترد

دہلی شراب پالیسی معاملے میں گرفتار بھارتیہ راشٹرا سمیتی (بی آر ایس) کی لیڈر اور تلنگانہ کے سابق وزیر اعلی کے چندرشیکھر راؤ کی بیٹی کے کویتا کو دہلی کی راؤز ایونیو کورٹ نے عبوری ضمانت دینے سے انکار کر دیا۔ انہوں نے اپنے 16 سالہ بیٹے کے امتحان کے حوالے سے پی ایم ایل اے کی دفعہ 45 کے تحت درخواست دی تھی، جس پر عدالت نے 4 اپریل کو سماعت کرتے ہوئے اپنا فیصلہ محفوظ کرلیا تھا۔ عدالت نے وہ فیصلہ آج سنایا جس میں اس نے کے کویتا کی درخواست کو مسترد کر دیا۔

سماعت کے دوان کے کویتا کی جانب سے پیش ہوئے سینئر وکیل ابھیشیک منو سنگھوی نے پی ایم ایل اے کی دفعہ 45 اور اس کی ایک ایسی شق کا حوالہ دیا تھا جو خواتین کو استثنیٰ فراہم کرتا ہے۔ سنگھوی نے اپنی دلیل میں کہا تھا کہ ایسا نہیں ہے کہ بچہ گود میں ہے یا چھوٹا ہے، اس کی عمر 16 سال ہے۔ لیکن یہاں معاملہ مختلف ہے۔ یہ ایک ماں کی اپنے بچے کی اخلاقی اور جذباتی حمایت کا مسئلہ ہے۔ اسے (کے کویتا کی گرفتاری سے ان کے بیٹے کو) پہلے ہی صدمہ پہنچ چکا ہے۔

ابھیشیک منو سنگھوی نے کہا وزیراعظم خود ریڈیو پر امتحانات کی دشواریوں سے نمٹنے کے بارے میں لیکچر دیتے ہیں، کیونکہ امتحانات کے دوران بچے دباؤ میں ہوتے ہیں۔ اس بات کی نشاندہی کرتے ہوئے کہ بچے کے لیے ماں کی جذباتی حمایت کو کوئی اور نہیں بدل سکتا، سنگھوی نے دلیل دی کہ ای ڈی کو کے کویتا سے کسی بھی فوری تفتیش کی ضرورت نہیں ہے، اس بنیاد پر انہیں عبوری ضمانت دی جا سکتی ہے۔

انفورسمنٹ ڈائریکٹوریٹ (ای ڈی) نے کے کویتا کی عبوری ضمانت کی درخواست پر اعتراض کرتے ہوئے دیگر دلائل کے ساتھ یہ دلیل بھی دی تھی کہ کیس کے حقائق اور حالات کو دیکھتے ہوئے انہیں پی ایم ایل اے کی دفعہ 45 کے تحت دی گئی رعایت کا فائدہ نہیں ملنا چاہیے۔ ای ڈی کی جانب سے پیش ہونے والے وکیل ایڈوکیٹ زوہیب حسین نے دلیل دی کہ اس دفعہ کا اطلاق ان خواتین پر نہیں ہوتا جو عوامی زندگی اور سیاست میں ہیں۔ ای ڈی کے وکیل نے دعویٰ کیا کہ کے کویتا دہلی شراب پالیسی کیس میں رشوت کے طور پر لی گئی رقم کے کلیدی آپریٹروں میں سے ایک تھیں۔ وکیل نے کہا کہ وہ نہ صرف رشوت کا بندوبست کرنے میں ملوث تھیں بلکہ فائدہ اٹھانے والی بھی تھیں۔ عدالت نے ای ڈی کے ان دلائل کو تسلیم کرتے ہوئے کے کویتا کی عبوری ضمانت کی درخواست مسترد کر دی۔