دہلی ایکسائز پالیسی معاملہ میں ای ڈی کی بڑی کارروائی، عآپ رہنما وجے نائر گرفتار
دہلی حکومت کی نئی ایکسائز پالیسی میں مبینہ گھپلے کا معاملہ رکنے کا نام نہیں لے رہا ہے۔ پیر کے روز ایک بڑی کارروائی میں ای ڈی نے عآپ رہنما وجے نائر اور تاجر ابھیشیک بوئن پلّی کو گرفتار کیا۔
انفورسمنٹ ڈائریکٹوریٹ (ای ڈی) نے پیر کے روز عام آدمی پارٹی (عآپ) کے میڈیا پبلسٹی انچارج وجے نائر اور تاجر ابھیشیک بوئین پلّی کو دہلی ایکسائز پالیسی گھوٹالے کی تحقیقات کے سلسلے میں منی لانڈرنگ کی روک تھام کے قانون (پی ایم ایل اے) کی دفعات کے تحت گرفتار کیا ہے۔ اس سے قبل دونوں کو سینٹرل بیورو آف انویسٹی گیشن (سی بی آئی) نے گرفتار کیا تھا اور پوچھ گچھ کے بعد انہیں عدالتی حراست میں بھیج دیا گیا تھا۔ عدالت میں ان کی درخواست ضمانت پر سماعت ہوگی۔
سی بی آئی نے بوئن پلّی کو دہلی کے جی این سی ٹی ڈی کی ایکسائز پالیسی بنانے اور لاگو کرانے کے لیے گرفتار کیا۔ حیدرآباد کے ایک ممتاز تاجر بوئن پلی کا نام تحقیقات کے دوران سامنے آیا تھا۔ انہیں تحقیقات میں شامل ہونے کے لیے بلایا گیا تھا، لیکن انہوں نے تحقیقاتی ایجنسی کے ساتھ تعاون نہیں کیا اور مبینہ طور پر انہیں گمراہ کرنے کی کوشش کی۔ حالانکہ ایف آئی آر میں ان کا نام نہیں تھا۔ دہلی کے جور باغ میں رہنے والے ایک تاجر، نائر سی بی آئی کے ذریعہ گرفتار ہونے والے پہلے شخص تھے۔
Follow us: Facebook, Twitter, Google News
قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔