نامیبیا سے آئے مزید ایک چیتے کی موت، پوسٹ مارٹم رپورٹ بتائے گا ’شوریہ‘ کی وفات کا سبب

کچھ دنوں پہلے کی بات ہے جب کونو نیشنل پارک میں نامیبیا سے آئی مادہ چیتا نے کچھ ننھے منے بچوں کو جنم دیا تھا۔ اب ایک بری خبر سامنے آ رہی ہے جس میں بتایا جا رہا ہے کہ نامیبیا سے آئے ایک چیتے کی موت ہو گئی ہے۔ اس چیتا کا نام ’شوریہ‘ تھا جو مردہ حالت میں مانیٹرنگ ٹیم کو پارک میں ملا ہے۔

قابل ذکر ہے کہ کونو نیشنل پارک میں اب تک 10 چیتوں کی موت ہو چکی ہے۔ ان میں 7 بڑی عمر کے چیتے ہیں اور 3 بچے ہیں۔ لائن پروجیکٹ ڈائریکٹر کا کہنا ہے کہ آج تقریباً 3.15 بجے ’شوریہ‘ نامی چیتا کی موت ہوئی۔ پوسٹ مارٹم رپورٹ سامنے آنے کے بعد پتہ چل پائے گا کہ ’شوریہ‘ کی موت کا سبب کیا تھا۔ لائن پروجیکٹ ڈاکٹر نے کہا کہ آج صبح تقریباً 11 بجے مانیٹرنگ ٹیم کو چیتا ’شوریہ‘ بیہوشی کی حالت میں ملا۔ اس چیتے کو بچانے کی بھرپور کوشش کی گئی، لیکن کامیابی نہیں مل سکی۔

واضح رہے کہ کونو نیشنل پارک میں نامیبیا اور جنوبی افریقہ سے 20 چیتے لائے گئے تھے۔ اب تک کونو کے چیتوں میں سے 10 کی موت ہو چکی ہے۔ حالانکہ اس درمیان کچھ مادہ چیتوں نے بچوں کو جنم بھی دیا ہے جس سے ہندوستان میں چیتوں کی تعداد بڑھانے کی کوشش کو حوصلہ ملا ہے۔