مدھیہ پردیش: پارٹی کے دوران دلت نے چھو دیا کھانا، تو دبنگوں نے پیٹ پیٹ کر کیا قتل

مدھیہ پردیش میں دبنگوں کے ذریعہ ایک دلت نوجوان کا پیٹ پیٹ کر قتل کیے جانے کا معاملہ سامنے آیا ہے۔ دلت نوجوان کی پٹائی اور قتل کا الزام اعلیٰ ذات کے لوگوں پر لگا ہے۔ میڈیا رپورٹس کے مطابق یہ معاملہ چھتر پور ضلع کا ہے، جہاں ایک دلت نوجوان کی دبنگوں نے اس لیے زبردست پٹائی کر دی کیونکہ اس نے ایک تقریب کے دوران رکھے گئے کھانے کو اپنے ہاتھوں سے چھو دیا تھا۔ اس پٹائی کے سبب دلت نوجوان کی موت واقع ہو گئی۔

موصولہ اطلاعات کے مطابق راجدھانی بھوپال سے تقریباً 450 کلو میٹر دور چھتر پور واقع کشن پور گاؤں میں کچھ لوگوں نے ایک تقریب کا انعقاد کیا تھا۔ پولس اہلکار کا کہنا ہے کہ پارٹی ختم ہونے کے بعد ملزم بھورا سونی اور سنتوش پال نے دیوراج انوراگی نامی ایک دلت نوجوان کو صفائی کے لیے بلایا۔ اسی دوران دیوراج پارٹی میں بنا کھانا اپنے لیے نکالنے لگا۔ یہ دیکھ کر بھورا اور سنتوش اس قدر ناراض ہو گئے کہ انھوں نے دیوراج کی لاٹھی ڈنڈے سے پٹائی شروع کر دی۔ انھوں نے اسے اتنا مارا کہ اس کی موت ہو گئی۔

بتایا جا رہا ہے کہ دیوراج کو ڈنڈے سے پیٹا گیا تھا جس سے وہ جاں بحق ہو گیا۔ اس معاملے میں دونوں ملزمین فرار بتائے جا رہے ہیں۔ حالانکہ پولس نے قتل کی دفعہ کے تحت کیس درج کر لیا ہے۔ پولس نے بتایا کہ ملزم سونی اور پال کے خلاف قتل اور ایس سی/ایس ٹی ایکٹ کے تحت کیس درج کر لیا گیا ہے۔ پولس سپرنٹنڈنٹ سچن شرما کا کہنا ہے کہ ملزمین کو جلد ہی پکڑ لیا جائے گا۔ پولس کی ٹیمیں ان کی تلاش میں لگاتار سرگرم ہیں۔