کورونا: لکھنؤ کے شمشان گھاٹ میں کم پڑ رہی جگہ، خوفناک نظارہ

ہندوستان کی راجدھانی دہلی سمیت کئی ریاستوں میں کورونا انفیکشن کی وجہ سے حالات بے حد خوفناک ہیں۔ اتر پردیش میں بھی کورونا نے اس بار قہر ڈھایا ہے۔ ریاست کے کئی شہروں میں حالات انتہائی سنگین ہیں۔ راجدھانی لکھنؤ میں تو حالات خوفناک ہیں جہاں لاشوں کو جلانے کے لیے بھی جگہ نہیں مل رہی ہے۔ شمشان گھاٹ پر اچانک بڑی تعداد میں لاشیں پہنچنے لگی ہیں، جس کی وجہ سے شمشان گھاٹ کی زمین کم پڑ رہی ہے اور آخری رسومات میں لوگوں کو کافی دقتوں کا سامنا کرنا پڑ رہا ہے۔

’آج تک‘ کی خبر کے مطابق حالات اتنے خراب ہو چکے ہیں کہ شمشان گھاٹ پر دفن کیے گئے بچوں کی لاشوں کے اوپر دوسری لاش رکھ کر جلایا جا رہا ہے۔ یہاں قابل ذکر ہے کہ ہندو رسم کے مطابق نابالغ بچوں کی لاشوں کو جلانے کی جگہ دفن کیا جاتا ہے، اور انہی دفن لاشوں کے اوپر لاشیں جلائی جا رہی ہیں۔ لکھنؤ کے عالم باغ واقع نہر کریمیٹوریم پر کچھ ایسے ہی نظارے دیکھنے کو مل رہے ہیں۔

دراصل جہاں بچوں کو دفن کیا جاتا ہے وہاں پر ایک چبوترہ بنا کر چھوڑ دیا جاتا ہے۔ اس بار کورونا انفیکشن سے ہلاک ہونے والے لوگوں کو انہی چبوتروں پر نذرِ آتش کیا جا رہا ہے۔ اس عمل سے لوگوں میں بہت ناراضگی بھی ہے، لیکن شمشان گھاٹ میں جگہ کی اس قدر کمی ہو گئی ہے کہ دفن بچوں کے چبوتروں پر لاشیں جلائی جا رہی ہیں۔ ناراض لوگوں کا کہنا ہے کہ انتظامیہ کی طرف سے کوئی توجہ نہیں دی جا رہی ہے۔

غور طلب ہے کہ اس بار لکھنؤ میں کورونا کا انفیکشن بہت تیزی سے پھیل رہا ہے۔ ہر دن اس وائرس کے سبب سینکڑوں لوگوں کی جان جا رہی ہے۔ شمشان گھاٹ میں جگہ کم پڑ رہی ہے۔ لکھنؤ میں دو شمشان گھاٹوں گلالہ شمشان گھاٹ اور بیکنٹھ دھام شمشان گھاٹ پر حالات ہولی کے بعد سے ہی بے حد خراب ہیں۔ یہاں ہر دن درجنوں لاشیں آخری رسومات کے لیے پہنچ رہی ہیں۔