جاسوسی کیس میں اسرو سائنسداں کے خلاف سی بی آئی جانچ کا حکم صادر

نئی دہلی: سپریم کورٹ نے ہندوستانی خلائی تحقیقاتی ادارہ (اسرو) کے سائنسدان نمبی نارائن پر 1994 میں لگائے گئے جاسوسی الزامات اور اس کے بعد ان کی ہراسانی کے معاملے میں مرکزی تفتیشی بیورو (سی بی آئی) کے ذریعہ تحقیقات کا حکم دیا ہے۔ جسٹس اے ایم خانویلکر کی سربراہی والی ڈویژن بنچ نے جسٹس ڈی کے جین کمیٹی کی رپورٹ کو تسلیم کرتے ہوئے سی بی آئی کو اس معاملے کی مزید تحقیقات کرنے کا حکم دیا۔

سپریم کورٹ نے فرضی جاسوسی کیس میں مسٹر نارائنن کو پھنسانے والے افسران کے خلاف بھی سی بی آئی انکوائری کا حکم دیتے ہوئے تفتیشی ایجنسی کو تین مہینے میں رپورٹ پیش کرنے کی ہدایت دی ہے۔ عدالت نے جسٹس ڈی کے جین کمیٹی کی رپورٹ کو ابتدائی تفتیش سمجھتے ہوئے مزید تحقیقات کا حکم دیا ہے۔ بنچ نے سی بی آئی کو یہ رپورٹ عام نہ کرنے کی بھی ہدایت دی ہے۔ اس معاملے میں مالدیپ کی دو خواتین اور ہندوستان کے دو سائنس دانوں پر الزام لگایا گیا تھا کہ وہ خفیہ دستاویزات بیرون ملک بھجوا رہے ہیں۔