ہماچل کے چار ضلعوں میں 27 اپریل سے 10 مئی تک لگے گا کورونا کرفیو

شملہ: ہماچل پردیش حکومت نے کورونا کے تیزی سے بڑھ رہے معاملوں کے پیش نظر ریاست کے چار ضلعوں کانگڑا، اونا، سولن اور سرمور میں 27 اپریل کی آدھی رات سے دس مئی تک صبح پانچ بجے تک کا کرفیو لگانے کا فیصلہ کیا ہے۔ وزیراعلی جے رام ٹھاکر کی صدارت میں ہوئی اعلی سطحی میٹنگ میں یہ فیصلہ کیا گیا۔

اعلی سطحی میٹنگ میں ریاست میں آنے والے سبھی لوگوں کو 72 گھنٹوں کے اندر آر ٹی پی سی آر جانچ کرانے اور ایسے کسی شخص نے اگر یہ جانچ نہیں کرائی ہے تو اسے اپنی رہائش گاہ پر 14 دن تک گھر میں قرنطینہ میں رہنے اور سات دن کے اندر یہ جانچ کرانا لازمی کرنے کا بھی فیصلہ کیا۔ اس جانچ میں نگیٹو پائے جانے پر اسے گھر میں قرنطینہ میں رہنے کی ضرورت نہیں ہوگی۔

میٹنگ میں یہ بھی فیصلہ کیا گیا کہ شہری اور دیہی علاقوں میں مقامی بلدیاتی اداروں کو اپنے علاقوں میں معیاری آپریٹنگ طریقہ کار (ایس او پی) اور رہنما خطوط مؤثر عمل میں لائیں گے اور ان کو یہ حق حاصل ہوگا کہ وہ خلاف ورزی کرنے والوں کے خلاف قانونی کارروائی کریں، تاکہ کورونا کی وبا کو پھیلنے سے روکا جا سکے۔

اجلاس میں تمام مذہبی، سماجی، سیاسی اور ثقافتی تقریبات کے دوران ایس او پی کو موثر انداز میں نافذ کرنے کے لئے مقامی سطح پر ایک خصوصی ٹاسک فورس تشکیل دینے کا فیصلہ کیا گیا۔ ان ٹیموں کو یہ بھی حق حاصل ہوگا کہ وہ ایس او پی کی خلاف ورزی کرنے والوں کے خلاف سخت کارروائی کرے۔