اگنی پتھ اسکیم کے خلاف کانگریس کا ملک گیر ستیہ گرہ 27 جون کو

مرکز کی مودی حکومت کے ذریعہ پیش کردہ اگنی پتھ اسکیم کے خلاف ملک بھر کے نوجوان سڑکوں پر اتر کر مظاہرہ کر رہے ہیں۔ اپوزیشن پارٹیاں بھی ان کی حمایت کرتی ہوئی نظر آ رہی ہیں۔ اس درمیان کانگریس نے اگنی پتھ اسکیم کے خلاف 27 جون کو ضلع سطح پر ستیہ گرہ پر بیٹھنے کا اعلان کر دیا ہے۔ کانگریس کی کوشش ہے کہ ایسا کر حکومت پر دباؤ بنایا جائے تاکہ جلد از جلد نوجوانوں اور ملک کے خلاف نظر آنے والی یہ اسکیم واپس ہو۔

کانگریس لیڈروں نے بتایا کہ اگنی پتھ کے خلاف ہماری لڑائی جاری رہے گی اور اسی ضمن میں ہمارے سبھی اراکین اسمبلی، اراکین پارلیمنٹ اور دیگر لیڈروں کی قیادت میں پارٹی کارکنان 27 جون کو اپنی اپنی ریاستوں کے سبھی اسمبلی حلقوں میں صبح 10 بجے سے دوپہر ایک بجے تک پرامن ستیہ گرہ پر بیٹھیں گے۔

قابل ذکر ہے کہ اپوزیشن پارٹیاں ہی نہیں، کسان تنظیمیں بھی اگنی پتھ اسکیم کے خلاف متحد ہوتی ہوئی نظر آ رہی ہیں۔ گزشتہ دنوں سنیوکت کسان مورچہ (ایس کے ایم) نے بھی اعلان کیا تھا کہ اس میں شامل کسان تنظیمیں 24 جون کو ملک گیر مظاہرہ کریں گی۔ سنیوکت کسان مورچہ نے کہا کہ اگنی پتھ کے خلاف مظاہرہ کر رہے نوجوانوں کا خدشہ جائز ہے اور مرکز کی مودی حکومت کے ذریعہ پیش کردہ اگنی پتھ اسکیم نوجوانوں کے ساتھ ساتھ ملک کے لیے بھی نقصاندہ ہے۔ مشہور کسان لیڈر راکیش ٹکیت نے 20 جون کو کیے گئے ایک ٹوئٹ میں لکھا تھا کہ ’’24 جون کو اگنی پتھ اسکیم کے خلاف ملک بھر میں ضلع-تحصیل ہیڈکوارٹرس پر احتجاجی مظاہرہ ہوگا۔‘‘