بہار: اگنی پتھ اسکیم کے خلاف اپوزیشن پارٹیوں کا راج بھون تک پیدل مارچ

فوج میں بھرتی کی نئی اسکیم اگنی پتھ کو لے کر طلبا کی مخالفت بھلے ہی تھم گئی ہو، لیکن بہار میں بدھ کو اہم اپوزیشن پارٹی آر جے ڈی اور بایاں محاذ کے لیڈروں نے اسمبلی سے راج بھون تک پیدل مارچ کیا۔ اس مارچ میں ان پارٹیوں کے اراکین اسمبلی، قانون ساز کونسل کے اراکین نے حصہ لیا۔ حالانکہ اس مارچ سے کانگریس نے اپنی دوری بنائے رکھی۔

آر جے ڈی اور بایاں محاذ کے اراکین اسمبلی اور اراکین قانون ساز کونسل قانون ساز کونسل احاطہ میں جمع ہوئے اور راج بھون مارچ کیا۔ اس مارچ میں سابق وزیر اعلیٰ رابڑی دیوی، آر جے ڈی لیڈر تیجسوی یادو، تیج پرتاپ یادو بھی موجود رہے۔ مارچ کرتے ہوئے تیجسوی یادو نے اگنی پتھ کو فوج کو کمزور کرنے والی اسکیم بتاتے ہوئے کہا کہ ملک کا ہر نوجوان اس منصوبہ کے خلاف ہے۔ انھوں نے کہا کہ ایک طرف نوجوانوں کو روزگار نہیں مل رہا ہے اور دوسری طرف چار سال کی ملازمت دے رہے ہیں۔

تیجسوی نے کہا کہ آر جے ڈی نوجوانوں کے ساتھ ہے اور اس ایشو کو لے کر ہم سڑک سے لے کر ایوان تک لڑتے رہیں گے۔ انھوں نے اس منصوبہ کو واپس لینے کا مطالبہ کیا۔ تیجسوی نے کہا کہ اگنی پتھ کے ذریعہ سے نوجوانوں کے مستقبل کے ساتھ کھلواڑ ہ و رہا ہے۔ جن لوگوں کی صرف بھرتی رہ گئی تھی اب ان کو پھر سے پورا عمل کرنا پڑے گا۔ سب سے بڑا سوال ہے کہ چار سال بعد نوجوان کیا کریں گے؟ ہم نوجوانوں کے مستقبل کے ساتھ کھلواڑ نہیں ہونے دیں گے۔