دہلی حکومت کی نئی آبکاری پالیسی کے خلاف پھر ملی شکایت، ایل جی نے دیا جانچ کا حکم

دہلی حکومت کی نئی آبکاری پالیسی پر لیفٹیننٹ گورنر (ایل جی) ونئے کمار سکسینہ پہلے ہی سی بی آئی جانچ کا حکم دے چکے ہیں، اب ان کو مزید ایک شکایت ملی ہے۔ اس شکایت کے پیش نظر لیفٹیننٹ گورنر نے دوسرے معاملے میں بھی جانچ کا حکم صادر کر دیا ہے۔ ایل جی دفتر سے ملی جانکاری کے مطابق ایل جی ونئے کمار سکسینہ نے بلیک لسٹ میں ڈالی گئی فرم کے حق میں آبکاری لائسنس کے ذریعہ سے سانٹھ گانٹھ کے الزام پر دہلی کے چیف سکریٹری سے رپورٹ طلب کی ہے۔

ایل جی کے اس قدم کے بعد دہلی حکومت کی مشکلات میں مزید اضافہ ہو سکتا ہے۔ پہلی شکایت کے بعد سی بی آئی جانچ کا حکم صادر کیے جانے پر سیاست گرم ہو ہی گئی تھی، اب نئی شکایت پر بھی جانچ کے حکم نے ماحول کو مزید گرم کر دیا ہے۔ دہلی آبکاری پالیسی کے خلاف تازہ شکایت معاملے میں جانچ رپورٹ 14 دنوں کے اندر تیار کرنے کو کہا گیا ہے۔ یہ شکایت کسی تنظیم کی جانب سے کی گئی ہے، حالانکہ اس تنظیم کا نام ابھی ظاہر نہیں کیا گیا ہے۔