’حکومت اور روپے کے درمیان مقابلہ چل رہا ہے...‘ روپے کی گراوٹ کو لے کر راہل گاندھی کا طنز

کانگریس لیڈر راہل گاندھی نے ایک بار پھر روپے میں مسلسل گراوٹ اور ملک کی معیشت کو لے کر پی ایم مودی پر طنز کیا ہے۔ بتا دیں کہ منگل کو ایک ڈالر کی قیمت 78.83 تک پہنچ گئی۔ اس گراوٹ کے ساتھ ہی روپیہ ڈالر کے مقابلے نئے ریکارڈ یعنی کم ترین سطح کو چھو گیا۔ روپے کی گراوٹ کو لے کر پی ایم مودی کے پرانے بیان کا حوالہ دیتے ہوئے راہل گاندھی نے مرکزی حکومت پر سخت حملہ کیا۔ کانگریس ایم پی نے ٹوئٹ کر کے لکھا، "حکومت اور روپے کے درمیان مقابلہ چل رہا ہے، کس کی آبرو تیزی کے ساتھ گرتی چلی جا رہی ہے، کون آگے جائے گا؟ یہ بات کس نے کہی؟" ملکی معیشت کی بگڑتی ہوئی حالت کو روکنے کے لیے تقریر کی بجائے گورننس پر توجہ دینی ہو گی۔ لیکن یہ وزیر اعظم کے بس کی بات نہیں ہے۔

معیشت اور روزگار کے معاملے پر مرکز سے لگاتار سوال کرنے والے راہل گاندھی نے دو دن پہلے روپے کی گراوٹ کے بعد بھی پی ایم مودی پر حملہ کیا تھا۔ راہل گاندھی نے کہا تھا کہ پی ایم مودی کی مہارت ان آفات کو چھپا نہیں سکتی- جیسے ڈالر کے مقابلے روپے کی ریکارڈ گراوٹ، ڈی ایچ ایف ایل بینکنگ فراڈ، ملک میں بے روزگاری کی بلند شرح، 30 سال کے بلند ہول سیل پرائس انڈیکس، ایل آئی سی کی قدر میں آئی کمی، جب ہندوستانی جدوجہد کر رہے ہیں تو وزیر اعظم اپنے اگلے منصوبہ میں مصروف ہیں۔

قابل ذکر بات یہ ہے کہ وزیر اعظم بننے سے پہلے نریندر مودی روپے کی گراوٹ کو لے کر یو پی اے حکومت پر حملہ کرتے رہے تھے لیکن ان کے وزیر اعظم بننے کے بعد بھی حالات سدھرنے کے بجائے بگڑتے چلے گئے۔ عالم یہ ہے کہ روپیہ ہر روز گرنے کے ریکارڈ بنا رہا ہے۔ منگل کو ہندوستانی روپیہ 46 پیسے گر کر 78.83 فی ڈالر کی سطح پر پہنچ گیا ہے۔