وزیر اعلیٰ اروند کیجریوال کو بخار اور گلے میں خراش کی شکایت، کل ہوگا کورونا ٹیسٹ

نئی دہلی: دہلی کے وزیراعلی اروند کیجریوال نے بخار اور گلے میں تکلیف کے پیش نظر خود کو الگ تھلگ کرلیا ہے اور منگل کو وہ کورونا کی جانچ کرائیں گے۔ عام آدمی پارٹی کے ترجمان اور راجیہ سبھا رکن پارلیمنٹ سنجے سنگھ نے پیر کو ٹوئٹ کر کے اس کی تصدیق کی۔ انہوں نے کہا ’’دہلی کے وزیراعلی اروند کیجریوال کو کل دوپہر سے بخار اور گلے میں درد کی شکایت ہے۔ انہوں نے ڈاکٹروں کی صلاح پر خود کو گھر میں آئیسولیٹ کر لیا ہے۔ 9 جون کو ان کا کورونا ٹیسٹ ہوگا۔ خدا سے دعا ہے کہ وہ جلد ٹھیک ہو جائیں۔‘‘

پارٹی ذرائع نے بتایا کہ اتوار کو پریس کانفرنس کے بعد کیجریوال کی طبیعت خراب ہوگئی تھی اور اس کے بعد انہوں نے خود کو سب سے الگ تھلگ کرلیا۔ وزیراعلی کے آج کے سبھی پروگرام منسوخ کردیئے گئے ہیں۔ واضح رہے کہ دارالحکومت میں کورونا وائرس کے معاملوں کی تعداد مسلسل بڑھ رہی ہے۔ دہلی میں کل تک کورونا کے تقریباً 29 ہزار معاملے آچکے ہیں ان میں سے 10999 کورونا مریض ابھی تک ٹھیک ہوچکے ہیں۔ وہیں 17,125 فعال مریضوں کا ابھی بھی علاج ہو رہا ہے۔ یہاں مرنے والوں کی تعداد 812 تک پہنچ چکی ہے۔ دہلی میں کورونا ہاٹ اسپاٹ کی تعداد بھی بڑھکر 186 ہوچکی ہے۔

دہلی حکومت میں وزیر سوربھ بھاردواج نے ایک چینل سے بات چیت کے دوران کیجریوال کی طبیعت خراب ہونے کی تصدیق کی۔ انہوں نے بتایا کہ گزشتہ کچھ دنوں میں وزیر اعلیٰ کے رابطہ میں آنے والے لوگوں سے احتیاط برتنی شروع کر دی ہے۔ بھاردواج نے کہا کہ وزیر اعلیٰ سیلف کوارنٹائن میں ہیں۔ کل صبح ٹیسٹ کے بعد تصدیق ہو جائے گی۔ وزیر نے کہا کہ کابینہ کی میٹنگس دور دور بیٹھ کر ہوتی تھیں۔ سرکاری افسران کو بھی احتیاط برتنی چاہیے۔

ملک کی راجدھانی میں کورونا وائرس کے معاملوں کی تعداد تیزی سے بڑھ رہے ہیں۔ پیر کی صبح تک دہلی میں تقریباً 29 ہزار معاملے سامنے آچکے تھے۔ ان میں سے 10999 کورونا مریض ابھی تک صحتیاب ہو چکے ہیں۔ وہیں 17125 فعال مریضوں کا ابھی تک علاج ہو رہا ہے۔ دہلی حکومت کے مطابق 12213 کورونا کے مریضوں کو ان کے گھروں میں ہی آئسولیشن میں رہنے کو کہا گیا ہے۔ یہاں مرنے والوں کی تعداد 812 پہنچ چکی ہے۔ دہلی میں کورونا ہاٹ اسپاٹ کی تعداد بھی بڑھ کر 169 ہو چکی ہے۔

دہلی کے وزیر صحت ستیندر جین کا کہنا ہے کہ اگر دو ہفتوں میں راجدھانی میں کورونا کے کیسز دوگنے ہوئے تو یہ تعداد 56 ہزار تک پہنچ جائے گی۔ ان سب کے بیچ دہلی حکومت نے پیر کے روز شاپنگ مال، مذہبی مقامات اور ریستوران کھولنے کا اعلان کیا ہے۔ لیکن ہوٹل اور بینکٹ ہال ابھی بند رہیں گے۔ یہ چھوٹ ان لاک 1 کے تحت دی گئی ہے۔