چراغ پاسوان نے این ڈی اے کو نقصان پہنچایا، ہم 160 سیٹیں حاصل کر سکتے تھے: سشیل مودی

بہار اسمبلی انتخاب کا نتیجہ آ چکا ہے اور این ڈی اے نے 125 سیٹوں پر فتح کا پرچم لہرا کر اکثریت حاصل کر لی ہے۔ اس کے باوجود بہار کے نائب وزیر اعلیٰ اور بی جے پی کے سینئر لیڈر سشیل مودی بہت خوش نظر نہیں آ رہے۔ ان کا کہنا ہے کہ این ڈی اے کو 150 سے 160 سیٹیں مل سکتی تھیں، لیکن چراغ پاسوان نے کچھ سیٹوں پر کافی نقصان پہنچایا۔ سشیل مودی نے واضح لفظوں میں کہا کہ چراغ پاسوان کی پارٹی ایل جے پی نے ووٹ کاٹنے کی سیاست کی جس کی وجہ سے این ڈی اے کو امید سے کم سیٹیں حاصل ہوئیں۔

سشیل مودی نے نتیش کمار کے ایک بار پھر وزیر اعلیٰ بننے کے تعلق سے بھی اپنا رد عمل میڈیا کے سامنے ظاہر کیا اور کہا کہ وہ این ڈی اے کا چہرہ ہیں اور اس تعلق سے کوئی شبہ پارٹی لیڈروں کے درمیان نہیں ہے۔ انھوں نے کہا کہ نتیش کمار کو این ڈی اے نے اپنا وزیر اعلیٰ امیدوار بنایا تھا اس لیے وہی وزیر اعلیٰ بنائے جائیں گے۔ ساتھ ہی این ڈی اے کی فتح پر اپنی خوشی ظاہر کرتے ہوئے انھوں نے کہا کہ ’’ایگزٹ پول کا رجحان آنے کے بعد پارٹی لیڈروں میں کچھ مایوسی ضرور تھی، لیکن ریزلٹ ہمارے حق میں آیا، اس سے سبھی نے راحت کی سانس لی ہے۔‘‘

اس درمیان سشیل مودی نے چراغ پاسوان اور این ڈی اے کے رشتوں پر بھی اپنا رد عمل ظاہر کیا۔ انھوں نے کہا کہ ’’ایل جے پی کی وجہ سے این ڈی اے کو 30-25 سیٹوں کا نقصان ہوا ہے، وہ بہار میں این ڈی اے کا حصہ نہیں ہے۔ مرکز میں اس کا کیا کردار ہوگا، اس کا فیصلہ مرکزی قیادت کرے گی۔‘‘