چین ہماری زمین پر قبضہ کر کے شہریوں کو اغوا کر رہا ہے اور وزیر اعظم اچھے دنوں کے انتظار میں ہیں: راہل گاندھی

نئی دہلی: کانگریس کے سابق صدر راہل گاندھی نے مودی حکومت کو تنقید کا نشانہ بناتے ہوئے چینی جارحیت کا مسئلہ اٹھایا ہے۔ راہل گاندھی نے کہا کہ ’’چین نے پہلے ہمارے ملک کی زمین پر قبضہ کیا اور اب ہمارے شہریوں کو اغوا کر کے اذیتیں دے رہا ہے۔ مودی جی خاموشی سے اچھے دنوں کا انتظار کر رہے ہیں، یہ شرمناک ہے۔‘‘

راہل گاندھی نے یہ رد عمل اروناچل پردیش کے بی جے پی ایم پی تاپیر گاؤ کے اس بیان پر دیا ہے جس میں انہوں نے کہا ہے کہ چین لگاتار ہمارے لوگوں کو اغوا کر رہا ہے، حکومت اس کا حل نکالے۔

خیال رہے کہ 18 جنوری کو چینی فوج نے میرام ترون نامی نوجوان کو اس وقت اغوا کر لیا تھا جب وہ اپنے دوست کے ساتھ شکار پر گیا تھا۔ اس کا دوست کسی طرح جائے وقوعہ سے بھاگنے میں کامیاب رہا اور اس نے افسران کو اس کی اطلاع فراہم کی۔ اس سے پہلے ستمبر 2020 میں چینی فوج نے بالائی سوبنسری ضلع میں پانچ نوجوانوں کو اغوا کر لیا تھا اور تقریباً ایک ہفتہ بعد انہیں رہا کیا تھا۔