ای ڈی کی چھاپہ ماری سے وزیر اعلیٰ بھوپیش بگھیل ناراض، کہا ’چھتیس گڑھیا کمزور اور بزدل نہیں‘

چھتیس گڑھ اسمبلی انتخاب کے پہلے مرحلہ کی ووٹنگ کے ٹھیک دوسرے دن کچھ مقامات پر ای ڈی کی چھاپہ ماری کو لے کر وزیر اعلیٰ بھوپیش بگھیل نے بی جے پی کو طنز کا نشانہ بنایا ہے۔ ساتھ ہی انھوں نے چھتیس گڑھ کی عوام کو بہادر اور باوقار بھی ٹھہرایا ہے۔

بھوپیش بگھیل نے سوشل میڈیا پلیٹ فارم ’ایکس‘ پر کیے گئے ایک پوسٹ میں لکھا ہے کہ ’’مجھے لگا تھا پہلے مرحلہ کا ایگزٹ پول کچھ دنوں بعد پتہ چلے گا، لیکن صاحب نے آج صبح ہی ظاہر کر دیا، صبح صبح ای ڈی کو میرے پرچۂ نامزدگی کے دوران میرے ساتھ موجود اور میرے انتخابی عمل میں آفیشیل اخراجات کا حساب رکھنے میں اہم کردار نبھا رہے سریش دھنگانی جی کے یہاں ای ڈی کو بھیج دیا ہے۔‘‘

وزیر اعلیٰ بگھیل نے اپنے پوسٹ میں یہ بھی لکھا ہے کہ ’’پاٹن اسمبلی کی عوام کو ڈرانے کی کوشش میں ویسے ہی ناکامی ملے گی، جیسی کل 20 اسمبلی سیٹوں پر ووٹنگ میں بی جے پی کو ملی ہے۔ چھتیس گڑھیوں کو کمزور اور بزدل مت سمجھو صاحب، اپنا چاول کھاتے ہیں، وہ بھی پورے وقار سے۔‘‘

دراصل بدھ کے روز ای ڈی نے ملک کے کئی حصوں میں چھاپہ ماری کی اور چھتیس گڑھ بھی اس میں شامل ہے۔ بھلائی باشندہ سریش سنگھانی کا نام بھی اس میں شامل ہے جن کے یہاں چھاپہ ماری ہوئی ہے۔ ٹھیک انتخاب کے دوران وزیر اعلیٰ کے قریبی اور کانگریس سے جڑے لوگوں پر ای ڈی کی کارروائی کو لے کر مرکز کی بی جے پی حکومت کی منشا کے ساتھ ہی مرکزی ایجنسیوں کے وقار پر بھی سوال کھڑے ہو گئے ہیں۔