چھتیس گڑھ حکومت نے ملازمین کو دی بڑی سوغات، 5 فیصد ڈی اے بڑھانے کا اعلان، پنشن کو لے کر بھی دی خوشخبری

چھتیس گڑھ میں آئندہ انتخاب کو لے کر وزیر اعظم نریندر مودی کے دورے سے ٹھیک پہلے ریاست کی بھوپیش بگھیل حکومت نے سرکاری ملازمین کے لیے سوغاتوں کی بارش کر دی ہے۔ کانگریس حکومت نے آج ریاست کے سرکاری ملازمین کا مہنگائی بھتہ 5 فیصد بڑھانے اور پنشن اہلیت کے لیے مقرر عمر کو 3 سال کام کرنے کا حکم جاری کیا ہے۔

موصولہ اطلاعات کے مطابق وزیر اعلیٰ بھوپیش بگھیل کی صدارت میں ہوئی میٹنگ میں حکومت نے ملازمین کے مہنگائی بھتہ (ڈی اے) میں 5 فیصد کا اضافہ کرنے کا اہم فیصلہ لیا۔ اس سے ریاستی حکومت پر سالانہ 1000 کروڑ روپے کا اضافی مالی بوجھ بڑھے گا۔ اس کے علاوہ سرکاری ملازمین کے مکمل پنشن کی اہلیت کی مدت کو 33 سال سے گھٹا کر 30 سال کر دی گئی ہے۔ اپنی مرضی سے سبکدوشی کے لیے ضروری سروس کی مدت کو بھی 20 سال سے گھٹا کر 17 سال کرنے کا فیصلہ کیا گیا ہے۔

آج ہوئی کابینہ میٹنگ میں بستر اور سرگوجا ڈویژن میں اساتذہ کے خالی 3722 اور معاون اساتذہ کے 5577 عہدہ بھرنے کے لیے تقرری اصول کو نرم کرتے ہوئے منظور شدہ سیٹ اَپ میں موضوع وار عہدوں کی تقرری کے رخنہ کو ہٹائے جانے کا فیصلہ لیا گیا۔ ریاستی حکومت کے ذریعہ عوام کو سستی شرحوں پر رہائش دستیاب کرانے کے لیے مارکیٹ پرائس گائیڈلائن کی شرحوں کو 30 فیصد گھٹایا گیا ہے۔ اس کی مدت کار 31 مارچ 2023 تک تھی۔ اس چھوٹ کو 31 مارچ 2024 تک بڑھانے کا اہم فیصلہ لیا گیا ہے۔