چار دھام یاترا: دو ہفتوں کے دوران 41 یاتری ہلاک

دہرادون: اتراکھنڈ میں ’چاردھام یاترا‘ کے آغاز کے بعد سے اب تک 40 سے زیادہ افراد اپنی جان گنوا چکے ہیں۔ ’آج تک‘ پر شائع ہونے والی ایک رپورٹ کے مطابق اب تک کم از کم 41 یاتری اپنی جان گنوا چکے ہیں۔ رپورٹ کے مطابق سب سے زیادہ اموات (15) کیدار ناتھ کی یاترا کے دوران واقع ہوئیں۔ اس کے علاوہ یمنوتری کی یاترا کرنے والے 14، بدری ناتھ کی یاترا کرنے والے 8 اور گنگوتری کی یاترا کرنے والے 4 عقیدت مندوں نے اپنی جان گنوائی۔

رپورٹ کے مطابق بیشتر یاتریوں کی موت ہائی بلڈ پریشر، دل سے متعلق امراض اور پہاڑ پر چڑھنے سے ہونے والی پریشانیوں کے سبب واقع ہوئیں، انتظامیہ نے صلاح دی ہے کہ اس طرح کی بیماریوں میں مبتلا افراد یاترا نہ کریں۔

خیال رہے کہ یاترا کا آغاز 3 مئی کو اکشے ترتیہ کے موقع پر وزیر اعلیٰ پشکر سنگھ دھامی کی موجودگی میں عقیدت مندوں کے لیے گنگوتری اور یمونوتری پورٹل کھولنے کے ساتھ ہوا تھا۔ جبکہ کیدارناتھ کے دروازے 6 مئی کو اور بدری ناتھ کے دروازے 8 مئی کو کھولے گئے۔

اتراکھنڈ میں بارش رکنے کے بعد بدری ناتھ یاترا دوبارہ شروع کر دی گئی ہے۔ بتایا جا رہا ہے کہ پیر کی رات موسلا دھار بارش اور لینڈ سلائیڈنگ کی وجہ سے یاترا روک دی گئی تھی۔ بدری ناتھ یاترا منگل کی صبح 6 بجے دوبارہ شروع کی گئی ہے۔ ادھر، بھاری بارش کے سبب کیدارناتھ پیدل یاترا کے راستہ پر گوری کنڈ میں ٹریفک جام لگا ہوا ہے، یہاں بڑی تعداد میں مسافر پھنسے ہوئے ہیں۔

چمولی میں موسلادھار بارش کی وجہ سے بدری ناتھ قومی شاہراہ پر ہنومان چٹّی سے بدری ناتھ کے درمیان، لام بگڑ میں کھچڑا نالے میں پانی میں اضافہ ہونے اور بلدوڑا میں لینڈسلائڈنگ کے سبب یاترا روک دی گئی ہے۔ یاتریوں کو پانڈوکیشور، بدری ناتھ جوشی مٹھ، پپل کوٹی، چمولی اور گوچر میں روکا گیا ہے۔

بدری ناتھ کے کپاٹ (دروازے) کھلنے کے بعد 8 مئی سے 16 مئی کی شام تک 176463 یاتریوں نے مندر میں درشن کئے ہیں۔ جبکہ کیدارناتھ دھام کے دروازے کھلنے کی تاریخ یعنی 6 مئی سے 16 مئی تک 213640 یاتریوں نے درشن کئے ہیں۔

دریں اثنا، بھاری بھیڑ کے سبب چاردھام یاترا پر جانے والے یاتریوں کی تعداد کو محدود کر دیا گیا ہے۔ اب بدری ناتھ میں روزانہ 16000، کیدارناتھ میں روزانہ 13000، گنگوتری میں روزانہ 8000 اور یمونوتری میں روزانہ 5000 عقیدت مند ہی درشن کر سکتے ہیں۔