مرکزی حکومت کا ہدف کورونا سے اموات کی شرح کم کرنا: ہرش وردھن

نئی دہلی: صحت اور خاندانی فلاح و بہبود کے مرکزی وزیر ڈاکٹر ہرش وردھن نے آج کہا کہ مرکزی حکومت کا ہدف ریاستوں اور مرکز کے زیرانتظام ریاستوں کے ساتھ متحد ہوکر کورونا وائرس کووڈ۔19 کے متاثرین کی شناخت کرکے اور موثر طبی انتظامات کے ذریعہ مریضوں کی اموات کی شرح کم کرنا ہے۔

ڈاکٹر ہرش وردھن کی قیادت میں جمعرات کو ہوئی کابینہ میٹنگ کی 18ویں اعلی سطحی میٹنگ میں ملک میں کووڈ۔19 انفیکشن کے موجودہ حالات اور اس کی رو ک تھام کے لئے مستقبل میں کیے جانے والے اقدامات پر بات چیت ہوئی۔ میٹنگ میں بتایا گیا کہ ملک میں کووڈ۔19سے متعلق صحت کے بنیادی ڈھانچے کو مضبوط کیا گیا ہے۔ ملک میں اس وقت کل ملاکر 3,914 اسپتال، صحت مراکز اور کووڈ کیئر سنٹر کورونا متاثرین کے علاج میں مصروف ہیں۔

ان صحت مراکز میں 3,77,737 آئسولیشن بیڈ (آئی سی یو سپورٹ کے بغیر)،39,820 آئی سی یو بیڈ اور 1,42,415 آکسیجن سپورٹیڈ بیڈ ہیں۔ اس کے علاوہ اب تک مجموعی طورپر 213.55 لاکھ این 95 ماسک، 12094 لاکھ پی پی آئی کٹ اور 612.57 لاکھ ہائیڈروکلوروکوین کی گولیاں تقسیم کی جاچکی ہیں۔

ڈاکٹر ہرش ورھن نے اپنے خطاب میں کہا کہ ہماری توجہ اب کووڈ۔19کے انفیکشن کی روک تھام پر مرکوز ہونی چاہیے۔ اس کے لئے کنٹینمنٹ اور سرویلانس کے سخت اقدامات کیے جانے چاہئیں، ٹیسٹ صلاحیت کا مکمل استعمال کرنا چاہیے، کسی دیگر بیماری سے متاثرہ شخص اور بزرگوں پر توجہ دینی چاہیے۔ آروگیہ سیتو جیسے ڈیجیٹل ٹول کے ذریعہ ابھرتا ہاٹ اسپاٹ کا پہلے سے پتہ لگایا جانا چاہیے اور مریضوں کے اسپتال میں داخلہ کا عمل بلا رخنہ ہونا چاہیے اور صحت پر مبنی بنیادی ڈھانچہ کی تیاری پر توجہ دینی چاہیے۔ ہمارا ہدف کورونا متاثرین کی جلد نشاندہی کرکے اور موثر طبی انتظامات کے ذریعہ ریاست اور مرکز کے زیرانتظام ریاستوں کے ساتھ متحد ہوکر متاثرین کی شرح اموات کم کرنا اور انفیکشن کی روک تھام کرنا ہے۔

ویڈیو کانفرنسنگ کے ذریعہ ہوئی وزرا گروپ کی میٹنگ میں وزیر خارجہ ایس جے شنکر، شہری ہوابازی کے وزیر ہردیپ سنگھ پوری، صحت اور خاندانی فلاح و بہبود کے وزیرمملکت اشونی کمار چوبے، کیمیکلز اور فرٹیلائزر کے وزیرمملکت منسکھ منڈاویا، نیتی آیوگ کے رکن ڈاکٹر ونود پال شامل ہوئے۔

میٹنگ میں ورچول میڈیا کے ذریعہ ہیلتھ سکریٹری پریتی سودن، وزارت صحت میں او ایس ڈی راجیش بھوشن، نیتی آیوگ کے چیف ایکزیکیوٹیو افسر امیتابھ کانت، انڈین کونسل آف میڈیکل ریسرچ کے ڈائریکٹر جنرل ڈاکٹر بلرام بھارگو اور دیگر کئی حکام بھی شامل ہوئے۔

کابینی گروپ کو اطلاع دی گئی کہ کورونا انفیکشن سے سب سے زیادہ متاثرہ پانچ ممالک سے ہندوستان سے موازنہ کرنے پر واضح پتہ چلتا ہے کہ فی لاکھ آبادی موت کے معاملے میں 15 اور انفیکشن کے معاملے 538 ہیں، جو تمل ناڈو، دہلی، کرناٹک، تلنگانہ، آندھراپردیش، اترپردیش اور گجرات کے ہیں۔