ہندوستان میں اب ڈرون سے بھی ہو سکے گی خون کی ڈیلیوری، آئی سی ایم آر نے کیا کامیاب تجربہ

کووڈ وبا کے دوران ملک کے دور دراز علاقوں میں ڈرون سے ویکسین اور دوائیاں بھیجنے کا کامیاب تجربہ کیا گیا تھا۔ اب جلد ہی اسپتالوں میں اسی ڈرون سے خون کی ڈیلیوری کی جا سکے گی۔ اس سے ایک جگہ سے دوسری جگہ پر خون پہنچانے میں انتہائی کم وقت لگے گا۔ انڈین کونسل فار میڈیکل ریسرچ (آئی سی ایم آر) نے بدھ کے روز دہلی میں اس کا کامیاب تجربہ کیا۔ اس کے لیے گورنمنٹ انسٹی ٹیوٹ آف میڈیکل سائنس (جی آئی ایم ایس) اور لیڈی ہارڈنگ میڈیکل کالج سے خون کے 10 نمونوں کا ڈرون کے ذریعہ ٹرانسپورٹیشن کیا گیا۔

ڈاکٹر بہل نے اس سلسلے میں بتایا کہ ہم نے ایمبولنس کے ذریعہ ایک سیمپل بھیجا ہے۔ ڈرون کے ذریعہ بھیجے گئے سیمپل سے اس کا ملان کیا جائے گا۔ اگر دونوں نمونوں میں کوئی فرق نہیں ہوگا تو اس کا استعمال پورے ہندوستان میں کیا جائے گا۔ آئی سی ایم آر کے ڈائریکٹر جنرل ڈاکٹر راجیو بہل کے مطابق ٹرائل میں آئی-ڈرون کا استعمال کیا گیا۔ اسے آئی سی ایم آر نے آئی آئی ٹی کانپور کے ساتھ مل کر تیار کیا ہے۔ بلڈ ڈیلیوری میں سب سے بڑی مشکل ٹرانسپورٹیشن کے وقت مناسب درجہ حرارت بنائے رکھنے کی ہوتی ہے۔ اس کے لیے ایک باکس میں خون کی تھلیاں رکھی گئی تھیں۔