بی جے پی کے نعرے دم توڑ رہے ہیں، عوام نے زمینی حقیقت سے واقف کرا دیا: بھوپندر ہڈا

نئی دہلی: کانگریس کے سینئر لیڈر اور ہریانہ کے سابق وزیر اعلی بھوپیندر سنگھ ہڈا نے بدھ کو لوک سبھا انتخابات کے نتائج پر کہا کہ بی جے پی کے نعرے اب دم توڑ رہے ہیں اور عوام پارٹی کو زمینی حقیقت سے آگاہ کر رہے ہیں۔ انہوں نے کہا کہ ملک کے عوام نے بی جے پی کو آئینہ دکھا دیا ہے۔

سابق وزیر اعلیٰ نے بھارتیہ جنتا پارٹی پر ذات پات اور مذہب کی بنیاد پر تقسیم کرنے کے حربے اپنانے کا بھی الزام لگایا۔ انہوں نے الزام لگایا کہ بی جے پی کے پاس دکھانے کے لیے کوئی کام اور کوئی موضوع نہیں ہے اور وہ صرف لوگوں کو ذات اور مذہب کی بنیاد پر لڑانا چاہتی ہے۔

ہڈا نے روہتک میں کہا کہ ملک کے عوام نے بی جے پی کو آئینہ دکھایا ہے، کیونکہ اس نے دعویٰ کیا تھا کہ لوک سبھا انتخابات میں قومی جمہوری اتحاد (این ڈی اے) 400 سیٹیں جیت لے گا۔ انہوں نے کہا کہ انتخابی کامیابی صرف نعروں سے نہیں بلکہ محنت سے حاصل ہوتی ہے۔ انہوں نے کہا کہ بی جے پی کے نعرے کمزور ہوتے جا رہے ہیں اور عوام انہیں زمینی حقیقت سے آگاہ کر رہے ہیں۔

سال 2019 میں ہوئے گزشتہ لوک سبھا انتخابات میں بی جے پی نے ہریانہ کی تمام 10 سیٹوں پر کامیابی حاصل کی تھی لیکن اس بار کانگریس ان میں سے پانچ سیٹیں جیتنے میں کامیاب ہوئی ہے۔ کانگریس کا ووٹ فیصد بھی بڑھا ہے جو 2019 میں 28.42 فیصد کے مقابلہ 43.67 فیصد ہو گیا۔