بی جے پی رکن پارلیمنٹ سنی دیول لاپتہ! پٹھان کوٹ میں ناراض عوام نے پھر لگائے پوسٹرس، استعفیٰ کا مطالبہ

پنجاب کے پٹھان کوٹ میں ایک بار پھر بی جے پی رکن پارلیمنٹ سنی دیول کے ’لاپتہ‘ ہونے کے پوسٹرس چپکائے گئے ہیں۔ پوسٹر پر سنی دیول کی تصویر کے ساتھ لکھا ہے ’گمشدہ کی تلاش، رکن پارلیمنٹ سنی دیول لاپتہ۔‘ یہ پوسٹر مقامی لوگوں نے لگائے ہیں جن کا الزام ہے کہ رکن پارلیمنٹ بننے کے بعد سنی دیول کبھی گرداس پور نہیں گئے۔ وہ خود کو پنجاب کا بیٹا کہتے ہیں، لیکن انھوں نے یہاں کوئی ترقیاتی کام نہیں کیا ہے۔

ایک مقامی شہری کا کہنا ہے کہ سنی دیول نے وہاں کے لیے کوئی ایم پی فنڈ الاٹ نہیں کیا ہے، اور نہ ہی مرکزی حکومت کا کوئی منصوبہ وہاں لائے ہیں۔ مقامی نوجوان نے کہا کہ اگر وہ کام نہیں کرنا چاہتے ہیں تو ان کو اپنا استعفیٰ دے دینا چاہیے۔

واضح رہے کہ اس سے قبل بھی کئی بار پٹھان کوٹ اور گرداس پور میں سنی دیول کے لاپتہ ہونے کے پوسٹر لگ چکے ہیں۔ اسی سال مئی اور اس سے پہلے جنوری میں سنی دیول کے لاپتہ ہونے کے پوسٹرس پٹھان کوٹ میں لگائے گئے تھے۔ دراصل طویل مدت سے سنی دیول پر جیت کے بعد اپنے پارلیمانی حلقہ میں نہ پہنچنے کا الزام لگتا رہا ہے۔ پارلیمانی حلقہ میں نہیں آنے پر اپوزیشن بھی ان کی کئی بار تنقید کر چکا ہے۔

بہرحال، سنی دیول کے لاپتہ ہونے کا پوسٹر لگنے کے بعد وہ ٹوئٹر پر ٹرول ہو گئے ہیں۔ سوشل میڈیا پر کچھ لوگوں نے جہاں سنی دیول کو غیر ذمہ دار بتایا ہے تو کئی لوگوں نے مذاقیہ انداز میں ان پر طنز بھی کسا۔ ایک شخص نے سنی دیول کے گمشدگی کے پوسٹر کو شیئر کرتے ہوئے لکھا تھا کہ پاکستان میں ڈھونڈیے، کہیں ہینڈ پمپ اکھاڑ رہے ہوں گے۔