کورونا: یوگی حکومت کے خلاف بی جے پی رکن اسمبلی نے کھٹکھٹایا ہائی کورٹ کا دروازہ!

کورونا بحران میں لگاتار ہو رہی اموات اور انفیکشن کے معاملات میں خاطرخواہ کمی نہ آنے سے اتر پردیش کی یوگی حکومت پہلے ہی پریشان ہے، اور اب بی جے پی کے رکن اسمبلی نے ہی آکسیجن کی کمی کو لے کر ریاستی حکومت کے خلاف آواز اٹھا دی ہے۔ غازی آباد کے لونی اسمبلی حلقہ سے منتخب ایم ایل اے نندکشور گوجر نے حکومت کے انتظامی افسر (اے ڈی ایم) پر آکسیجن کی کالابازاری کا الزام عائد کرتے ہوئے ہائی کورٹ کا دروازہ کھٹکھٹایا ہے۔ اس تعلق سے ہائی کورٹ نے ضلع مجسٹریٹ سے دو ہفتے کے اندر حلف نامہ داخل کرنے کا حکم جاری کر دیا ہے اور ساتھ ہی آئندہ 7 جون کو سماعت کی تاریخ مقرر کی ہے۔

دراصل رکن اسمبلی نندکشور گوجر نے یکم مئی کو اے ڈی ایم شیلندر کمار سنگھ پر الزام عائد کرتے ہوئے ان پر مقدمہ درج کرنے کا مطالبہ کیا تھا۔ اس معاملے پر وہ ایس ایس پی سے بھی ملے تھے اور جب وزیر اعلیٰ یوگی آدتیہ ناتھ غازی آباد پہنچے تو ان سے بھی شکایت کی۔ لیکن اس معاملے میں انتظامی افسر کے خلاف کوئی جانچ نہیں ہوئی۔ اس سے مایوس ہو کر انھوں نے ہائی کورٹ کا دروازہ کھٹکھٹانا ہی مناسب سمجھا۔

عدالت میں نندکشور گوجر نے بتایا کہ کووڈ-19 کے دوران غازی آباد میں آکسیجن کی کمی سے لاتعداد لوگوں کی موت ہوئی ہے۔ انھوں نے ان اموات کے لیے انتظامی افسران کو ہی ذمہ دار ٹھہرایا اور کہا کہ ان کے خلاف کوئی کارروائی نہیں ہوئی جو مایوس کن ہے، اسی لیے انھیں عدالت کی پناہ میں آنا پڑا۔ عدالت نے معاملے کی سنجیدگی کو دیکھتے ہوئے نندکشور گوجر کی عرضی کو منظور کر لیا ہے دونوں فریق کی سماعت کے لیے 7 جون کی تاریخ مقرر کی ہے۔