بی جے پی رکن اسمبلی آشیش شیلار کو ممبئی میئر کے خلاف تضحیک آمیز بیان بازی بھاری پڑی

بی جے پی رکن اسمبلی اور سابقہ سرکار میں کابینی وزیر آشیش شیلار کو ممبئی عظمٰی میونسپل کارپوریشن کی میئر اور شیوسینا لیڈر کشوری پیڈنیکر کے خلاف تضحیک آمیز بیان بھاری پڑ گیا۔ ممبئی پولیس نے ممبئی بی جے پی کے سابق صدر آشیش شیلار کے خلاف تضحیک آمیز بیان کی بناء پر آئی پی سی کی دفعہ 354 اے اور 509 کے تحت مقدمہ درج کر لیا تھا۔ اس معاملے میں آشیش شیلار نے ممبئی کے مرین لائنس پولیس اسٹیشن پہنچ کر ایک لاکھ روپئے کے عوض آن ٹیبل ضمانت حاصل کیں۔

واضح رہے کہ آشیش شیلار نے ممبئی میں ایک پریس کانفرنس سے خطاب کرتے ہوئے ممبئی کے ورلی علاقے میں رسوئی گیس سلنڈر بلاسٹ معاملے پر ممبئی کی میئر کشوری پیڈنیکر کو تنقید کا نشانہ بناتے ہوئے ان کے خلاف نازیبا کلمات ادا کئے تھے۔ میئر کشوری پیڈنیکر نے ممبئی پولیس میں نازیبا کلمات کی ادائیگی کے خلاف بی جے پی لیڈر آشیش شیلار کے خلاف شکایت درج کروائی تھی۔

آشیش شیلار نے قبل از گرفتاری ضمانت حاصل کرنے کے بعد بامبے ہائی کورٹ سے رجوع کیا اور ان کے خلاف میئر کشوری پیڈنیکر کی درخواست پر دائر مقدمات کو منسوخ کرنے کا مطالبہ کیا۔ آشیش شیلار نے کہا کہ ان کے خلاف غیر قانونی طریقے سے ایف آئی آر درج کی گئی ہے۔ شیلار نے کہا کہ مہا وکاس اگھاڑی سرکار کے خلاف آواز بلند کرنے پر ان کے خلاف مقدمہ درج کیا گیا ہے، ان کی آواز کو دبانے کی کوشیش کی جا رہی ہے۔

واضح رہے کہ گزشتہ دنوں ممبئی کے ورلی علاقے کی بی ڈی ڈی چار میں رسوئی گیس سلنڈر بلاسٹ کا حادثہ پیش آیا تھا۔ اس حادثے میں تین افراد ہلاک ہوئے تھے۔ آشیش شیلار کے ذریعے کشوری پیڈنیکر کی شان میں تضحیک آمیز بیان بازی اور مقدمے کے بعد بی جے پی لیڈران آشیش شیلار کی حمایت میں آگے آگئے ہیں۔ اس درمیان آشیش شیلار کے ذریعے نازیبا کلمات کی ادائیگی کے خلاف کشوری پیڈنیکر نے مہاراشٹر کے وزیر داخلہ دلیپ ولسے پاٹل سے بھی شکایت کی ہے۔