’بی جے پی نے جھارکھنڈ کی پہچان کو مجروح کیا‘، کانگریس لیڈران کے ساتھ میٹنگ میں کھڑگے کا اظہارِ خیال

کانگریس کی جھارکھنڈ یونٹ نے اس سال کے آخر میں ہونے والے اسمبلی انتخاب سے متعلق پالیسیوں پر تبادلہ خیال کرنے کے مقصد سے 24 جون کو دہلی میں پارٹی کی اعلیٰ قیادت کے ساتھ تبادلہ خیال کیا۔ پارٹی کے قومی صدر ملکارجن کھڑگے نے اس میٹنگ کی صدارت کی۔ میٹنگ میں سینئر لیڈر راہل گاندھی، کے سی وینوگوپال اور غلام احمد میر سمیت کئی دیگر لیڈران نے شرکت کی۔

میٹنگ کے بعد کانگریس صدر نے کہا کہ پارٹی جھارکھنڈ کے سبھی طبقات کے حقوق کی حفاظت کے لیے پوری طرح وقف ہے۔ انھوں نے مزید کہا کہ اسمبلی انتخاب کے پیش نظر پارٹی پوری طرح سے تیار ہے اور کانگریس کے ایک ایک کارکن کو عوام کے درمیان رہنا ہوگا۔

کھڑگے نے میٹنگ کے بعد سوشل میڈیا پلیٹ فارم ’ایکس‘ پر ایک پوسٹ بھی کیا ہے۔ اس میں انھوں نے لکھا ہے کہ ’’کانگریس پارٹی جھارکھنڈ کے جَل (پانی)، جنگل، زمین اور قبائلی سماج سمیت سبھی طبقات کے حقوق سے متعلق پوری طرح وقف ہے۔ بی جے پی نے سازشی سیاست کر کے جھارکھنڈ کی پہچان کو مجروح کیا ہے۔ آنے والے اسمبلی انتخاب کے لیے کانگریس کے ایک ایک کارکن کو عوام کے درمیان رہنا ہے۔ سماجی انصاف اور شراکت داری کے لیے ہم سبھی پرعزم ہیں۔‘‘

واضح رہے کہ جھارکھنڈ کی 81 رکنی اسمبلی کے لیے 2019 میں انتخاب ہوا تھا۔ جھارکھنڈ مکتی مورچہ نے اس وقت اتحاد والی حکومت تشکیل دی۔ 91 رکنی جھارکھنڈ اسمبلی میں اکثریت کے لیے 43 اراکین اسمبلی کی ضرورت ہوتی ہے۔ اتحاد کے پاس ابھی 48 اراکین اسمبلی ہیں۔ یہ اتحاد جے ایم ایم کے 29، کانگریس کے 17، آر جے ڈی اور سی پی آئی (ایم ایل) کے ایک ایک اراکین اسمبلی پر مشتمل ہے۔