راجیہ سبھا کا ٹکٹ کٹنے کے بعد بے چین آر سی پی سنگھ کو سکون کی تلاش!

بہار میں برسراقتدار جنتا دل یو کے سینئر لیڈر اور مرکزی وزیر آر سی پی سنگھ کا راجیہ سبھا سے پتہ صاف ہونے کے بعد پٹنہ واقع ان کی رہائش بھی چھین لی گئی ہے۔ اس کے بعد ان کے خاص مانے جانے والے پارٹی ترجمان اجئے آلوک سمیت چار لیڈروں کو بھی پارٹی سے باہر کا راستہ دکھا دیا گیا۔ اب مرکزی وزیر کے عہدہ پر بھی تلوار لٹکی ہوئی ہے۔ ایسے میں آر سی پی سنگھ کی پریشانی اور بے چینی بڑھ گئی ہے۔ نتیجہ کار سکون کی تلاش میں وہ مذہبی پیشواؤں کے چوکھٹ تک پہنچ گئے ہیں اور ان کا آشیرواد لے رہے ہیں۔ مذہبی پیشواؤں سے ملاقات کرنے کی جانکاری انھوں نے خود اپنے فیس بک وال پر پوسٹ کی ہے۔

سَنتوں سے آشیرواد لینے کے لیے وہ ہریدوار بھی پہنچے جہاں وہ یوگا گرو بابا رام دیو سے ملے۔ آر سی پی سنگھ نے اپنے فیس بک پر پوسٹ کرتے ہوئے لکھا کہ ہندوستانی یوگا کو دنیا کے گوشے گوشے تک پہنچانے والے بابا رام دیو سے ملاقات ہوئی اور ان کے ساتھ پتنجلی یوگ پیٹھ میں واقع ویدک کنیا گروکل کا دورہ کیا۔ اس دوران انھوں نے بابا رام دیو کے ساتھ یوگا بھی کیا۔ آر سی پی سنگھ کا کہنا ہے کہ یوگا کو طرز زندگی کی شکل میں اختیار کرانے میں پتنجلی یوگ پیٹھ کا بہت بڑا تعاون ہے۔

مرکزی وزیر آر سی پی سنگھ اس کے بعد نرنجنی اکھاڑے کے آچاریہ مہامنڈلیشور سوامی کیلاشانند گری مہاراج سے بھی ملے اور ان کا آشیرواد لیا۔ اس کے بعد انھوں نے سوامی کیلاشانند گری مہاراج کے ساتھ اپنی تصویر بھی فیس بک پر پوسٹ کی۔ آر سی پی سنگھ اپنی ہریدوار یاترا کے دوران شانتی کنج ہریدوار میں شیلبالا پنڈیا سے مل کر ان کا آشیرواد حاصل کیا۔ انھوں نے مذہبی پیشواؤں سے آشیرواد لینے کی تصویر پوسٹ کی ہے جس پر لوگ طرح طرح کا رد عمل ظاہر کر رہے ہیں۔