بہار: شدید سردی کے درمیان لگاتار بارش، متعدد اضلاع میں معمولات زندگی درہم برہم

پٹنہ: بہار میں شدید سردی اور ٹھنڈی ہواؤں سے پریشان لوگوں کو اب بارش کا ستم جھیلنا پڑ رہا ہے۔ دارالحکومت پٹنہ سمیت ریاست کے بارہ سے زیادہ ضلعوں میں اتوار کی صبح سے رک رک کر بارش شروع ہوگئی ہے۔ وہیں، ریاست کے زیادہ تر ضلعوں میں آسمان میں بادل چھائے ہوئے ہیں۔ موسم کے کروٹ بدلنے سے سردی کا ستم جھیل رہے لوگوں کی پریشانی اور بڑھ گئی ہے۔

محکمہ موسمیات کے مطابق اگلے 48 گھنٹے تک ریاست میں اسی طرح کے موسم بنے رہنے کا امکان ظاہر کیا گیا ہے۔ وہیں 25 جنوری تک کچھ مقامات پر ہلکی سے درمیانے درجے کی بارش کے آثار بنے ہوئے ہیں۔ دراصل اس دوران پچھوا اور پروئیا ہوا کے میل سے شدید بارش کے آثار ہیں، جبکہ 24 جنوری کے لئے بہار میں الرٹ جاری کیا گیا ہے۔ موسم میں ہوئی تبدیلی کی وجہ سے ہفتے کی شام سے عرب ساگر کی سمت سے آرہی سوکھی پچھوا اور بنگال کی خلیج سے آرہی نمی مائل پروئیا کی ہواؤں کا میل ہے۔ اس کی وجہ سے بہار کے جنوب مغربی حصے سمیت وسطی بہار میں درمیانےسے گھنے بادلوں نے ڈیرا لگا رہا ہے۔

محکمہ موسمیات نے پٹنہ سمیت دیگر ضلعوں میں لوگوں سے احتیاط برتنے کی اپیل کی ہے۔ اتوار کی صبح پٹنہ، ویشالی، نالندا، نوادا، گوپال گنج سمیت کئی ضلعوں میں ہلکی بارش ہوئی۔ بارش کا یہ سلسلہ اگلے 48 گھنٹوں یعنی 25 جنوری تک برقرار رہنے کی امید ہے۔ وہیں بارش کے بعد ریاست میں کہرا اور ٹھنڈ کا اثر اور بڑھنے کا امکان ہے۔ خصوصاً اس ماہ کے آخری ہفتے میں ریاست میں سردی کا اثر مزید بڑھنے کا امکان ہے۔

وہیں، موسم کا مزاج بدلنے سے شدید ٹھنڈ جھیل رہے لوگوں کو تھوڑی راحت ملی ہے۔ پچھلے 24 گھنٹوں کے دوران ریاست میں زیادہ درجہ حرارت سبھی جگہ دو سے چار ڈگری تک بڑھ گیا ہے۔ وہیں کم از کم درجہ حرارت میں بھی تبدیلی آئی ہے۔ پٹنہ سمیت کئی ضلعوں میں ایک بار پھر کم از کم درجہ حرارت 10 ڈگری سیلسیس سے زیادہ درج کیا گیا۔