بی جے پی رکن اسمبلی نے کھولی بہار حکومت کی قلعی، کیے کئی حیرت انگیز انکشافات

بہار میں برسراقتدار اتحاد میں شامل بی جے پی رکن اسمبلی ہی اب اپوزیشن کی زبان بولنے لگے ہیں۔ بی جے پی رکن اسمبلی ہری بھوشن سنگھ نے ہفتہ کے روز کہا کہ ریاست میں نیچے کی سطح پر لوٹ مچی ہوئی ہے۔ انھوں نے کہا کہ افسر شاہی نہیں ’ڈاکو شاہی‘ چل رہی ہے۔

بہار اسمبلی احاطہ میں صحافیوں سے گفتگو کرتے ہوئے ہری بھوشن سنگھ نے کہا کہ اراکین اسمبلی کی ہی بات نہیں سنی جا رہی ہے تو عوام کا کیا حال ہوگا۔ بی جے پی رکن اسمبلی نے اپنی ہی حکومت پر ناراض ہوتے ہوئے کہا کہ بی جے پی اور جنتا دل یو سنبھل جائیں ورنہ اس کا نتیجہ بہت برا ہوگا۔ انھوں نے کہا کہ نچلی سطح تھانہ و بلاک میں کوئی کام نہیں ہو رہا ہے۔ سرکاری افسر لوٹنے کے علاوہ کچھ کام نہیں کر رہے ہیں۔ انھوں نے مزید کہا کہ پولیس بغیر پیسے لیے کسی کی نہیں سنتی ہے۔

بی جے پی رکن اسمبلی کے اس بیان پر جب کانگریس قانون ساز پارٹی کے لیڈر اجیت شرما سے رد عمل مانگا گیا تو انھوں نے بھی بی جے پی رکن اسمبلی کے بیان کی حمایت کرتے ہوئے کہا کہ وہ اس میں کوئی غلط بات نہیں کہہ رہے ہیں۔ انھوں نے کہا کہ بہار میں شراب بندی ہے، جہاں زہریلی شراب سے موت ہوتی ہے، وہاں پر ایس پی اور ڈی ایم جا کر لوگوں پر دباؤ بناتے ہیں کہ آپ کہیے کہ موت شراب سے نہیں بیماری سے موت ہوئی ہے۔ انھوں نے الزام عائد کیا کہ این ڈی اے کی حکومت میں انتظامیہ کے عہدیدار اپنے آپ کو ہی حکومت سمجھ رہے ہیں۔

اجیت شرما نے یہاں تک کہا کہ اب وزیر اعلیٰ نتیش کمار کو اس پر غور کرنا چاہیے، اب اپنے ہی ساتھی سوال اٹھا رہے ہیں۔ یہ بات اب کسی سے پوشیدہ نہیں ہے کہ بہار میں افسر شاہی عروج پر ہے۔ انھوں نے کہا کہ حکومت میں اراکین اسمبلی کی آواز نہیں سنی جا رہی ہے۔