بہار انتخابات: این ڈی اے میں گھمسان اور نڈا کی نتیش سے ملاقات

پٹنہ: بہار میں رواں سال ہونے جا رہے اسمبلی انتخابات سے قبل حکمراں قومی جمہوری اتحاد (این ڈی اے) میں گھمسان شروع ہو گیا ہے اور لوک جن شکتی پارٹی (ایل جے پی) کے قومی صدر چراغ پاسوان نے نتیش کمار کے خلاف محاذ کھولا ہوا ہے اور رام ولاس پاسوان نے بھی اس معاملہ پر چراغ کے رُخ کی حمایت کی ہے۔ اسی دوران بی جے پی کی طرف سے دعویٰ کیا جا رہا ہے کہ این ڈی اے کے تمام اتحادی یکجا ہو کر انتخابی میدان میں اتریں گے۔

بی جے پی کے قومی صدر جے پی نڈا نے ہفتہ کے روز بہار کے وزیر اعلیٰ اور جے ڈی یو کے سربراہ نتیش کمار سے ملاقات کی۔ بی جے پی صدر نڈا پارٹی کے بہار معاملوں کے انچارج بھوپندر یادو، ریاستی صدر ڈاکٹر سنجے جیسوال اور نائب وزیراعلی سشیل کمار مودی کے ساتھ وزیر اعلی نتیش کمار سے ان کی سرکاری رہائش گاہ پر پہنچے تھے۔

ملاقات کے بعد ایک تقریب سے خطاب کرتے ہوئے جے پی نڈا نے واضح کیا کہ بی جے پی اور ایل جے پی، نتیش کمار کی قیادت میں ہی اسمبلی کے انتخابات لڑیں گی۔ میڈیا رپورٹ کے مطابق اس میٹنگ میں جے ڈی یو کے رکن پارلیمنٹ راجیو رنجن عرف للن سنگھ بھی موجود تھے۔ ایسا سمجھا جارہا ہے کہ نتیش کمار سے ملاقات کے دوران اسمبلی انتخابات میں این ڈی اے کے اتحادی پارٹیوں کے درمیان سیٹوں کی تقسیم کے سلسلے میں بات چیت کی گئی۔ کہا جا رہا ہے کہ بی جے پی 50-50 کا فارمولہ چاہتی ہے۔

این ڈی اے کی ایک دیگر پارٹی لوک جن شکتی پارٹی (ایل جے پی) اور جے ڈی یو کے درمیان کافی تلخی ہے۔ وہیں مہا گٹھ بندھن سے رشتہ توڑ کر آئے سابق وزیراعلی اور ہندوستانی عوام مورچہ (ہم) کے صدر جیتن رام مانجھی اب وزیراعلی نتیش کمار کے سہارے این ڈی اے میں شامل ہوئے ہیں۔ اس میٹنگ کے بعد سیٹوں کی تقسیم پر کیا فارمولہ طے کیا گیا اس کا ابھی انکشاف نہیں ہو پایا ہے۔