جھارکھنڈ میں بی جے پی کو بڑا جھٹکا، مانڈو سیٹ کے ایم ایل اے جئے پرکاش پٹیل کانگریس میں شامل

لوک سبھا انتخابات سے عین قبل بی جے پی کو ایک اور جھٹکا لگا ہے۔ اس باراسے یہ جھٹکا جھارکھنڈ میں لگا ہے جہاں کی مانڈو سیٹ سے اس کے ایم ایل اے جے پرکاش پٹیل بی جے پی کو چھوڑ کر کانگریس میں شامل ہو گئے ہیں۔ جئے پرکاش پٹیل کا شمار جھارکھنڈ میں بی جے پی کے اہم لیڈران میں ہوتا رہا ہے۔ 

کانگریس پارٹی میں شامل ہونے کے بعد جئے پرکاش پٹیل نے کہا کہ 2019 کے لوک سبھا انتخابات میں نہ صرف بھارتیہ جنتا پارٹی بلکہ پورے این ڈی اے اتحاد نے 11 لوک سبھا سیٹوں پر مہم چلائی تھی اور بی جے پی کو اکثریت دلائی تھی۔ میں نے ان کی اتحادی آجسو (آل جھارکھنڈ اسٹوڈنٹس یونین) کے لیے بھی مہم چلائی تھی۔ اس وقت صورتحال ایسی تھی کہ ہمیں محسوس ہوا  کہ ہمیں جھارکھنڈ کے لوگوں اور اپنے والد ٹیک لال مہتو کے خوابوں کو شرمندۂ تعبیر کرنے کے لیے کام کرنا چاہیے جو جھارکھنڈ تحریک کے سرکردہ رہنما تھے۔

پٹیل نے کہا کہ میں نے محسوس کیا کہ جھارکھنڈ کو خوبصورت بنانے اور آگے بڑھانے کے ٹیک لال مہتو کے خوابوں کو این ڈی اے میں شامل ہو کر آگے بڑھایا جا سکتا ہے اور اسی لیے میں بی جے پی میں شامل ہوا۔ مگر بی جے پی میں شامل ہونے کے بعد میں نے اپنے والد کے خواب اور نظریات کو بی جے پی میں نہیں پایا۔ میرے والد ہمیشہ مہا گٹھ بندھن کے حامی رہے ہیں اور آج میں یہ کہتے ہوئے فخر محسوس کر رہا ہوں کہ راہل گاندھی کی قیادت میں انڈیا الائنس جس طرح پورے ملک میں آگے بڑھ رہا ہے، آئندہ لوک سبھا انتخابات میں اس کے شاندار نتائج آنے والے ہیں۔

جئے پرکاش پٹیل نے کہا کہ راہل گاندھی نے جس طرح سے پد یاترا کی اس سے جھارکھنڈ کے لوگوں میں ان کے تئیں دلچسپی بڑھ گئی ہے۔ اس بار نوجوان لیڈر راہل گاندھی کی قیادت میں جھارکھنڈ کے لوگوں نے انڈیا الائنس کو لوک سبھا کی 14 سیٹیں جیت کر جھارکھنڈ کو بچانے کا فیصلہ کیا ہے۔ اسی عزم کے ساتھ آج میں نے بھی کانگریس پارٹی میں شمولیت اختیار کی ہے۔ جئے پرکاش پٹیل کے کانگریس میں شامل ہوتے وقت جھارکھنڈ کانگریس کے صدر راجیش ٹھاکر اور انچارج غلام احمد میر موجود تھے۔